មីយ៉ាន់ម៉ា៖ អង្គការជាង ២០០ នៅទូទាំងពិភពលោក បានជំរុញដល់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ ឲ្យដាក់បម្រាមលើការនាំចូលអាវុធទៅក្នុងសហភាពមីយ៉ាន់ម៉ា ដោយនិយាយថា ពេលវេលាសម្រាប់សេចក្ដីថ្លែងការណ៍នានាបានកន្លងហួសទៅ ហើយ ចាំបាច់ត្រូវមានចំណាត់ការភ្លាមៗ ដើម្បីជួយការពារក្រុមអ្នកតវ៉ាដោយស្ងៀមស្ងាត់ប្រឆាំងនឹងរបបយោធា និងក្រុមប្រឆាំងនឹងរបបសឹកមួយនេះ។
សេចក្ដីថ្លែងការណ៍មួយចេញ ដោយក្រុមអង្គការក្រៅរដ្ឋាភិបាលបាននិយាយថា យោធាគ្មានក្ដីអាណិតសម្រាប់ជីវិតមនុស្សទេ ចាប់តាំងពីរដ្ឋប្រហាររបស់ខ្លួនកាលពីថ្ងៃទី១ ខែកុម្ភៈ ដែលបានសម្លាប់មនុស្សយ៉ាងហោចណាស់ ៧៦៩នាក់រួមទាំងកុមារ ៥១នាក់ ក្នុងនោះមានកុមារអាយុ ៦ឆ្នាំម្នាក់ និងបានឃុំខ្លួនក្រុមសកម្មជន ក្រុមអ្នកសារព័ត៌មាន មន្ត្រីរដ្ឋការ និងអ្នកនយោបាយរាប់ពាន់នាក់។ សេចក្ដីថ្លែងការណ៍ខាងលើនិយាយថា មនុស្សរាប់រយនាក់ផ្សេងទៀតបានបាត់ខ្លួន។ បណ្ដាអង្គការក្រៅរដ្ឋាភិបាលនិយាយថា គ្មានរដ្ឋាភិបាលណាគួរលក់គ្រាប់កាំភ្លើងឲ្យទៅយោធាទេ ក្រោមកាលៈទេសៈនេះ។ ការដាក់បម្រាមនាំចូលអាវុធទៅកាន់មីយ៉ាន់ម៉ាគឺជាជំហានចាំបាច់បំផុត ដែលក្រុមប្រឹក្សាសន្តិសុខអង្គការសហប្រជាជាតិ គួរតែឆ្លើយតបចំពោះអំពើហិង្សាដែលចេះតែកើនឡើង នៅសហភាពមីយ៉ាន់ម៉ា។
ពួកគេបាននិយាយថា អង្គការនានាបានជំរុញចក្រភពអង់គ្លេស និងបណ្ដាប្រទេសនៅសមាជិកក្រុមប្រឹក្សាសន្តិសុខអង្គការសហប្រជាជាតិ ទទួលខុសត្រូវចំពោះពង្រាងសេចក្ដីសម្រេចនានាលើមីយ៉ាន់ម៉ា ដើម្បីចាប់ផ្ដើមការចរចាលើសេចក្ដីសម្រេច ឲ្យមានការហាមប្រាមការនាំចូលអាវុធឆាប់ៗនេះ តាមដែលអាចធ្វើទៅបាន។ ចំណាត់ការនេះនឹងបង្ហាញប្រាប់យោធាថា នឹងពុំមានការធ្វើពាណិជ្ជកម្មដូចធម្មតាទៀតឡើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
