ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចំណាយពេលមួយថ្ងៃនៅវិមានក្រឹមឡាំង មួយថ្ងៃបន្ទាប់ពីមានការចោទប្រកាន់ពីការវាយប្រហារដោយយានដ្រូន។
កាលពីថ្ងៃព្រហស្បតិ៍ (៤ ឧសភា) រដ្ឋបាលប្រធានាធិបតីរុស្ស៊ីបានចេញផ្សាយ វីដេអូនៃជំនួបរវាងលោកពូទីន និងរដ្ឋមន្ត្រីក្រសួងអភិវឌ្ឍន៍សេដ្ឋកិច្ច លោកMaxim Reshetnikov នៅវិមានក្រឹមឡាំង។
កាលពីថ្ងៃព្រហស្បតិ៍ រុស្ស៊ីបានចោទប្រកាន់សហរដ្ឋអាមេរិកថាជាអ្នកនៅពីក្រោយអ្វីដែលខ្លួននិយាយថាជាការវាយប្រហារដោយយានដ្រូនទៅលើវិមានក្រឹមឡាំងនៃទីក្រុងមូស្គូ ដែលមានបំណងធ្វើឃាតលោកប្រធានាធិបតីពូទីន។
មួយថ្ងៃបន្ទាប់ពីការស្តីបន្ទោសអ៊ុយក្រែនចំពោះអ្វីដែលខ្លួនហៅថាជាការវាយប្រហារភេរវកម្ម រដ្ឋបាលវិមានក្រឹមឡាំងបានបង្វែរការចោទប្រកាន់នេះទៅលើសហរដ្ឋអាមេរិក វិញប៉ុន្តែមិនបានផ្តល់ភស្តុតាងអ្វីនោះទេ។
សេតវិមានបានច្រានចោលការចោទប្រកាន់នេះភ្លាមៗ។ កាលពីព្រលឹមថ្ងៃពុធ អ៊ុយក្រែនក៏បានបដិសេធការជាប់ពាក់ព័ន្ធក្នុងឧបទ្ទវហេតុនេះផងដែរ នៅពេលដែលខ្សែវីដេអូបង្ហាញវត្ថុចំនួនពីរហោះចូលទៅជិតអគារព្រឹទ្ធសភានៅខាងក្នុងកំពែងវិមានក្រឹមឡាំង ហើយវត្ថុមួយបានផ្ទុះដោយបញ្ចេញពន្លឺយ៉ាងភ្លឺ។
លោក ពូទីន មិនបាននៅក្នុងវិមានក្រឹមឡាំងនៅពេលហេតុការណ៍នោះកើតឡើងទេ ហើយក្រុមអ្នកវិភាគសន្តិសុខ បាននិយាយបែបចំអកចំពោះគំនិតដែលថាឧបទ្ទវហេតុនេះគឺជាការប៉ុនប៉ងធ្វើឃាតដ៏ពិតប្រាកដនោះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
