រុស្សីបានវាយប្រហារហ្វូងយានដ្រូនដ៏ធំបំផុតរបស់ខ្លួន អស់រយៈពេលជាច្រើនខែមកនេះប្រឆាំង នឹងប្រទេសអ៊ុយក្រែន កាលពីថ្ងៃចន្ទ នៅមុខថ្ងៃឈប់សម្រាកទី៩ ខែឧសភារបស់ប្រទេសរុស្ស៊ី ដែលជាថ្ងៃអបអរដល់ការផ្តួលរលំលើពួកណាស៊ីអាល្លឺម៉ង់ ក្នុងឆ្នាំ១៩៤៥ ដោយបានវាយប្រហារ រដ្ឋធានីគីវ និងទីក្រុងសមុទ្រខ្មៅ Odesa ហើយបានបាញ់ផ្លោងទៅលើទីក្រុងផ្សេងៗទៀត។

អភិបាលក្រុងគីវ បាននិយាយថា រុស្ស៊ីបានវាយប្រហារដោយដ្រូនអត្តឃាតផលិតដោយអ៊ីរ៉ង់ចំនួន៦០គ្រឿង​ ទៅលើ​គោលដៅរបស់អ៊ុយក្រែន រួមមានដ្រូន៣៦គ្រឿងវាយទៅលើទីក្រុង​របស់​លោក ដែលដ្រូនទាំងនោះត្រូវបានបាញ់ទម្លាក់ទាំងអស់។ ​បំណែកផ្សេងៗបានធ្លាក់បុកចំផ្ទះអគារ​លំនៅឋាន​ និងអគារនានា ​ដោយបណ្ដាលឱ្យមនុស្សយ៉ាងតិច ៥នាក់រងរបួស។

ឃ្លាំងស្តុកអាហារមួយកន្លែង ត្រូវបានឆេះដោយមីស៊ីល ក្នុងទីក្រុង Odesa ជាទីដែលក្រុមមន្ត្រីបាន​រាយការណ៍ថា មនុស្ស៣នាក់ បានរងរបួស។ វាគឺជាវាយប្រហារដោយហ្វូងយានដ្រូនដ៏ធំបំផុតនៅក្នុងយុទ្ធនាការវាយប្រហារផ្លូវ​អាកាស​ជាថ្មីរបស់រុស្សី ​ដែលបានចាប់ផ្តើមកាលពី ​១០ថ្ងៃមុន ​បន្ទាប់ពីមានការស្ងប់ស្ងាត់ តាំងពី​ដើមខែមីនាមក។

មេដឹកនាំអ៊ុយក្រែនលោក Volodymyr Zelenskyy បានប្រារព្ធទិវាជ័យជម្នះនៅថ្ងៃទី៨ ខែឧសភាជា​ជាងថ្ងៃទី៩ ខែឧសភា ​ដោយបានផ្លាស់ប្តូរកាលបរិច្ឆេទនៃថ្ងៃឈប់សម្រាក​នេះឱ្យត្រូវគ្នា​នឹង​ទម្លាប់របស់សម្ព័ន្ធមិត្តលោកខាងលិច។«សូមឱ្យជ័យជម្នះរបស់យើងលើអំពើអាក្រក់នាពេលបច្ចុប្បន្នរបស់ពួក Rashism គឺជាវិធីសាស្ត្រ​ដ៏ល្អបំផុត ដើម្បីជាការគោរពដល់ការចងចាំរបស់អ្នកដែលបានប្រយុទ្ធ​នឹងពួកណាស៊ី»។ នេះជាការលើកឡើងរបស់លោក Zelenskiy ក្នុងសុន្ទរកថាជាវីដេអូ ​កាលពីយប់ថ្ងៃចន្ទ ដោយ​ប្រើប្រាស់​ពាក្យពេចន៍ធម្មតាទូទៅ ​ក្នុងប្រទេសអ៊ុយក្រែន ដើម្បីនិយាយសម្ដៅដល់ពួកហ្វាស៊ីស​និយមរុស្ស៊ី។

រុស្ស៊ីបានវាយលុកលើប្រទេសអ៊ុយក្រែន ក្នុងខែកុម្ភៈ ​ឆ្នាំ២០២២ ​ដោយនិយាយថា ខ្លួនចង់កម្ទេចពួកណាស៊ីជិត​ខាងរបស់ខ្លួន​ ដើម្បីការពារប្រទេសរុស្ស៊ី។​ អ៊ុយក្រែន និង​សម្ព័ន្ធមិត្តលោកខាងលិច ​បានលើកឡើងថា ​សង្រ្គាមរបស់ទីក្រុងម៉ូស្គូនេះ គឺជាការ​ច្បាមយកទឹកដីតាម​បែប​ចក្រពត្តិនិយម៕