ប្រជាជនស៊ែរប៊ីរាប់ម៉ឺននាក់ បានមកប្រមូលផ្តុំគ្នា នៅក្នុងរដ្ឋធានី Belgrade កាលពីថ្ងៃចន្ទ ទី៨ ខែឧសភា ដោយទាមទារវិធានការសន្តិសុខកាន់តែប្រសើរ បម្រាមលើកម្មវិធីនាំឲ្យមានអំពើហិង្សាតាមទូរទស្សន៍ និងការលាលែងពីតំណែងរបស់រដ្ឋមន្ត្រីសំខាន់ៗ ជាច្រើនថ្ងៃបន្ទាប់ពីការបាញ់ប្រហារទ្រង់ទ្រាយធំដាច់ដោយឡែកពីគ្នាចំនួន២លើក។

ហ្វូងមនុស្សក្នុងចំនួនដ៏ច្រើន ពុំត្រូវបានមើលឃើញក្នុងប្រទេសតំបន់បាល់កង់មួយនេះជាច្រើនឆ្នាំមកហើយ បានចេញដង្ហែក្បួនបាតុកម្មយ៉ាងច្រើនឆ្លងកាត់ភាគកណ្តាលទីក្រុង នៅពីក្រោមបដាដែលដាក់ខ្លឹមសារថា «ស៊ែរប៊ីប្រឆាំងអំពើហិង្សា»។

កាលពីថ្ងៃពុធ សិស្សសាលាម្នាក់ដែលបានយកកាំភ្លើងខ្លីពីរដើមមកកាន់សាលារៀនរបស់គេ បានសម្លាប់សិស្ស៦នាក់ គ្រូបង្រៀនម្នាក់ និងឆ្មាំសន្តិសុខម្នាក់ ហើយសិស្ស៦នាក់ និងគ្រូបង្រៀនម្នាក់ផ្សេងទៀត បានរងរបួស។ ១ថ្ងៃក្រោយមក បុរសវ័យ២១ឆ្នាំម្នាក់ បានកាន់កាំភ្លើងវែងវាយប្រហារ និងកាំភ្លើងខ្លីមួយដើមបានសម្លាប់មនុស្ស៨នាក់ និងរងរបួស១៤នាក់ នៅប្រទេសស៊ែរប៊ីភាគកណ្តាល។ អ្នកបាញ់ប្រហារទាំងពីរនាក់តូវបានចាប់ខ្លួន។

ក្រុមអ្នកតវ៉ា និងអ្នកគាំទ្រក្រុមប្រឆាំងបានទាមទាឲ្យបិទស្ថានីយទូរទស្សន៍ និងសារព័ត៌មានដែលបង្ហាញរូបភាពគួរឲ្យភ័យខ្លាច ដែលពួកគេបានចោទប្រកាន់ ពីការជំរុញឲ្យមានអំពើហិង្សា និងកម្មវិធីដែលមានខ្លឹមសារមិនថ្លៃថ្នូរ។ក្រុមបាតុករ បានទាមទាឲ្យមានសម័យប្រជុំសភាបន្ទាន់ និងជជែកដេញដោលអំពីស្ថានភាពសន្តិសុខ។ លោកស្រី Snezana ស្រ្តីវ័យ៦០ឆ្នាំ ដែលពុំបានផ្តល់នាមត្រកូល បាននិយាយថា គាត់មកទីនេះ ដើម្បីបង្ហាញពីសាមគ្គីភាពប្រឆាំងអំពើហិង្សាដែលកំពុងរីករាលដាលនៅក្នុងប្រព័ន្ធផ្សព្វផ្សាយ នៅក្នុងសភា និងនៅក្នុងជីវិតប្រចាំថ្ងៃ។

ក្នុងការឆ្លើយតបចំពោះការបាញ់ប្រហារ នគរបាលស៊ែរប៊ី កាលពីថ្ងៃចន្ទ បានចាប់ផ្តើមការ​លើកលែងទោសរយៈពេល១ខែសម្រាប់ការប្រគល់អាវុធខុសច្បាប់។ នគរបាលនិយាយថា អាវុធជាង ១,៥០០ដើម ត្រូវបានប្រគល់ឲ្យនៅថ្ងៃដំបូង។ បន្ថែមទៅលើច្បាប់អាវុធដែលមានស្រាប់ ប្រធានាធិបតីលោក Aleksandar Vučić បានប្រកាសថា នគរបាលនឹងពិនិត្យម្ចាស់អាវុធដែលបានចុះ បញ្ជី។