ឧត្តរមានជ័យ៖ ឯកឧត្តម ហ៊ុន ម៉ានី បាននាំយកអាវភ្លៀង និងសម្ភារៈ មួយចំនួន​ទៀតដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តី និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់ជូនដល់កងកម្លាំងប្រដាប់អាវុធប្រចាំទី៣ ចំណុះឱ្យយោធភូមិភាគទី៤ ស្ថិតក្នុងភូមិសាស្រ្តខេត្តឧត្តរមានជ័យ នារសៀលថ្ងៃទី៨ ខែឧសភា ម្សិលមិញនេះ ។

ក្នុងឱកាសនេះដែរឯកឧត្តម ហ៊ុន ម៉ានី តំណាងសម្តេចតេជោ ហ៊ុន សែន បាននាំយកនូវការ​សួរសុខទុក្ខ និងក្តីនឹករឭកពីសម្តេចទាំងទ្វេ ព្រមទាំងកោតសរសើរ ចំពោះកងកម្លាំង​ប្រដាប់អាវុធ​ទាំងអស់ ដែលជានិច្ចជាកាលបានលះបង់កម្លាំងកាយចិត្ត ក្នុងការបំពេញ តួរនាទីភារកិច្ចរបស់ខ្លួន​ប្រកបដោយភាពអង់អាចក្លាហាន​ គ្រប់កាលៈទេសៈ កងកម្លាំង ទាំងអស់តែងតែ​ចុះជួយអន្តរាគមន៍​សង្រ្កោះរាល់បញ្ហាប្រឈមនានា ដែលកើតមានឡើងនៅក្នុងតំបន់របស់ខ្លួន ពិសេសនោះជួយ​ដល់ប្រជាពលរដ្ឋែលរងគ្រោះបានគ្រប់ពេលវេលាទាំងផ្នែកសន្តិសុខសុវត្ថិភាព សង្គម។

ឯកឧត្តម ហ៊ុន ម៉ានី បានបន្តទៀតថា បើទោះបីជាពេលវេលានេះកម្ពុជា​កំពុងតែមានភាពសំបូរ​សប្បាយ​ជាមួយការ​និងរៀបចំព្រឹត្តិការណ៍ស៊ីហ្គេមយ៉ាងណាក្ដី ក៏​សម្តេច​ទាំងទ្វេ​មិនដែល​ភ្លេចចំពោះបងប្អូនកងកម្លាំង​ដែលឈរជើងនៅតាមខ្សែរបន្ទាត់ព្រំដែននោះឡើយ។

ឯកឧត្តម បានបន្ថែមទៀតថា ក្នុងកាលៈទេសៈពេលនេះ រាជរដ្ឋាភិបាលកម្ពុជា​បាន​និងកំពុង​ខិតខំប្រឹងប្រែង​យ៉ាងសស្រាក់សស្រាំ​ក្នុងការរៀបចំព្រឹត្តិការណ៍​កីឡា​អាស៊ីអាគ្នេយ៍​លើកទី៣២ ​និង​លើកទឹកចិត្តដល់ក្រុមកីឡាករតំណាងព្រះរាជាណាចក្រកម្ពុជា ​ក៏​ពិតមែន ប៉ុន្តែប្រមុខរាជរដ្ឋាភិបាល​នូវតែ​បន្តយកចិត្ត​ទុកដាក់​គិតគូរ​ខ្ពស់​ដល់​កងកម្លាំងប្រដាប់អាវុធជួរមុខ​គ្រប់រូប​ដែល​បាននិងកំពុងបំពេញភារកិច្ចប្រចាំ ​ការងារ​ស្នូលនៅតាមភូមិសាស្រ្តរបស់កងកម្លាំង​ទាំងអស់​ប្រកបដោយ​ភាពទទួលខុសត្រូវខ្ពស់បំផុត ​ជាពិសេសកងកម្លាំង​ដែលឈរជើង​តាម​ខ្សែរបន្ទាត់ព្រំដែន។

ក្នុងនោះដែរ​ឯកឧត្តម ហ៊ុន ម៉ានី ក៏បានប្រគល់ជូននូវ ​អាវភ្លៀង ​អង្ករ​និង​ថវិកា​មួយចំនួន​ដល់អង្គភាព​នីមួយៗផងដែរ៕