ក្រសួងការបរទេសចិន បានប្រកាសឲ្យដឹងកាលពីថ្ងៃចន្ទថា ប្រធានាធិបតីចិន លោក Xi Jinping នឹងធ្វើជាប្រធានកិច្ចប្រជុំកំពូលចិន-អាស៊ីកណ្តាល ដែលកំណត់រៀបចំឡើងនៅថ្ងៃទី១៨ និងទី១៩ ខែឧសភាខាងមុខនេះ នៅទីក្រុង Xi'an ខេត្តភាគពាយ័ព្យ Shaanxi ប្រទេសចិន។ 

 ក្រោមការអញ្ជើញរបស់ចិន ប្រធានាធិបតីកាហ្សាក់ស្ថានលោក Kassym-Jomart Tokayev ប្រធានាធិបតីកៀជីស្ថានលោក Sadyr Japarov ប្រធានាធិបតីតាជីគីស្ថានលោក Emomali Rahmon ប្រធានាធិបតីទួកមេននីស្ថានលោក Serdar Berdimuhamedov និងប្រធានាធិបតីអ៊ូសបេកគីស្ថានលោក Shavkat Mirziyoyev នឹងចូលរួមកិច្ចប្រជុំកំពូលលើកនេះ ។ 

 ចាប់តាំងពីការបង្កើតទំនាក់ទំនងការទូតរបស់ពួកគេកាលពីរយៈពេល ៣ទសវត្សរ៍មុន ចិន និងបណ្តាប្រទេសទាំង ៥នៅអាស៊ីកណ្តាល បានអភិវឌ្ឍភាពជាដៃគូយុទ្ធសាស្រ្ត និងបង្កើតវិថីថ្មីនៃភាពជាអ្នកជិតខាងល្អ មិត្តភាព និងកិច្ចសហប្រតិបត្តិការឈ្នះ-ឈ្នះ ។ 

រដ្ឋមន្រ្តីក្រសួងពាណិជ្ជកម្មចិនលោក Wang Wentao និយាយថា ពាណិជ្ជកម្មចិនជាមួយបណ្តាប្រទេសទាំង ៥នៅអាស៊ីកណ្តាល បានឈានដល់កម្រិតខ្ពស់ជាប្រវត្តិសាស្រ្តតម្លៃ ៧០.២ពាន់លានដុល្លារ ក្នុងឆ្នាំ ២០២២ ពោលគឺកើនឡើងប្រហែល ១០០ដងលើទំហំពាណិជ្ជកម្មកាលពីរយៈពេល ៣០ឆ្នាំមុន ។ 

នៅក្នុងឆ្នាំ ២០២២ ការនាំចូលកសិកម្ម ថាមពល និងផលិតរ៉ែរបស់ចិនពីប្រទេសទាំងនេះ បានហក់ឡើងខ្ពស់ជាង ៥០ភាគរយ ស្របពេលដែលការនាំចេញផលិតផលមេកានិច និងអេឡិចត្រូនិចរបស់ពួកគេ បានកើនឡើង ៤២ភាគរយ។ 

កាលពីឆ្នាំមុន ភាគហ៊ុនវិនិយោគដោយផ្ទាល់របស់ចិននៅក្នុងប្រទេសអាស៊ី-កណ្តាលទាំង ៥ បានកើនឡើងជិត ១៥ពាន់លានដុល្លារ ដោយមានការដាក់ចេញគម្រោងកិច្ចសហប្រតិបត្តិការជាច្រើនលើវិស័យប្រេង និងការរុករកឧស្ម័ន ការផលិត ការតភ្ជាប់ទំនាក់ទំនង និងបច្ចេកវិទ្យាឌីជីថល ៕