អាកាសធាតុត្រជាក់ជាងមុនកាលពីថ្ងៃចន្ទបាននាំមកនូវភាពធូរស្រាលខ្លះដល់ក្រុមអ្នកពន្លត់អគ្គីភ័យ ដែលកំពុងប្រយុទ្ធនឹងចំហេះព្រៃ ដែលឆេះរាលដាលនៅភាគខាងលិចប្រទេសកាណាដា។ ប៉ុន្តែក្រុមមន្ត្រីបានព្រមានថា វាអាចប្រើរយៈពេលច្រើនទម្រាំអាចគ្រប់គ្រងចំហេះព្រៃនេះបាន។ ច្បាប់គ្រាអាសន្ន ត្រូវបានប្រកាសនៅក្នុងខេត្ត Alberta កាលពីថ្ងៃសៅរ៍ ដោយមានដាក់ពង្រាយក្រុមអ្នកពន្លត់អគ្គីភ័យជាង ៧០០នាក់។

មានចំហេះព្រៃបន្តឆេះរាលដាលជិត ១០០ករណី កំពុងកើតឡើងនៅខេត្ត Alberta ហើយប្រហែលមួយភាគបីនៃទំហំចំហេះព្រៃនេះ ត្រូវបានចាត់ទុកថា "មិនអាចគ្រប់គ្រងបាន" ។ មនុស្សជាង ២៩.០០០នាក់ ត្រូវបានជម្លៀសចេញពីលំនៅឋានរបស់ពួកគេរហូតមកដល់ពេលនេះ។ អ្នកជំងឺជិត ៣០០នាក់ នៅក្នុងមណ្ឌលថែទាំរយៈពេលវែងក៏ត្រូវបានផ្លាស់ប្តូរទៅកន្លែងសុវត្ថិភាពផងដែរ។

កាលពីថ្ងៃចន្ទ ប្រមុខរដ្ឋាភិបាលខេត្ត Alberta លោក Danielle Smith បានប្រកាសថារដ្ឋាភិបាលនឹង  ផ្តល់ជំនួយហិរញ្ញវត្ថុគ្រាអាសន្នមួយគ្រាដល់ប្រជាពលរដ្ឋដែលផ្លាស់ទីលំនៅដោយសារចំហេះព្រៃនេះ។

រដូវកាលភ្លើងឆេះព្រៃដែលមិនធ្លាប់មានពីមុនមក បានកាត់ផ្ដាច់យ៉ាងហោចណាស់ ៣% នៃផលិតកម្មថាមពលរបស់ប្រទេសកាណាដា។ ប្រទេសនេះគឺជាប្រទេសផលិតប្រេងឆៅធំបំផុតទីបួនរបស់ពិភពលោក ហើយប្រហែល ៨០% នៃប្រេងរបស់ខ្លួនបានមកពីខេត្ត Alberta ។ ចំហេះព្រៃនេះ បានប៉ះពាល់យ៉ាងខ្លាំងដល់ក្រុមហ៊ុនផលិតប្រេង និងឧស្ម័នធម្មជាតិ ដែលបានបិទប្រតិបត្តិការដើម្បីសុវត្ថិភាព៕