ភ្នំពេញ៖ សូម​កោតសរសើរ​ចំពោះ​ថ្នាក់ដឹកនាំ មន្ត្រីរាជការ អាជ្ញាធរ​ដែនដី​គ្រប់លំដាប់​ថ្នាក់ កងកម្លាំង​ប្រដាប់​អា​វុ ធ​គ្រប់​ប្រភេទ និង​ប្រជាពលរដ្ឋ​ទូទាំង​ខេត្តសៀមរាប ដែល​បាន​រួមគ្នា​ជា​កម្លាំង​សរុប​ក្នុងការ​លើកកម្ពស់​កិត្យានុភាព​ជាតិ តាមរយៈ​ការចូលរួម​សហការ​រៀប​ចំ​ព្រឹត្តិការណ៍​អង្គ​រស​ង្ក្រា​ន​, ព្រឹត្តិការណ៍​បំបែក​ឯតទគ្គកម្ម​ពិភពលោក​បត់​បេះដូង​ជិត ៤លាន និង​រាំ​ម៉ា​ឌី​ហ្សុ​ន​ដែលមាន​អ្នករាំ​ច្រើនជាងគេ​សរុប ៤.៩៩៩ នាក់ ព្រមទាំង​ព្រឹត្តិការណ៍​កីឡា​អាស៊ីអាគ្នេយ៍​លើក​ទី​៣២ ក្នុង​វិញ្ញាសា​រត់​ម៉ា​រ៉ា​តុង និង​ដើរ​ប្រណាំង​ជាដើម ដោយ​ព្រឹត្តិការណ៍​ទាំងអស់នេះ សុទ្ធតែ​បានរួម​ចំណែក​ក្នុងការ​ផ្សព្វផ្សាយ និង​លើកតម្កើង​កិត្តិ​យ ស​ជាតិខ្មែរ​នៅលើ​ឆាក​អន្តរជាតិ​។

នេះ​បើតាម​ឯកឧត្តម​បណ្ឌិត ហ៊ុន ម៉ា​ណែ​ត ប្រធាន​គណៈកម្មាធិការ​អាហារូបករណ៍​សិស្ស​-​និស្សិត​ក្រីក្រ​របស់​សម្ដេច​អគ្គមហាសេនាបតី​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុនរ៉ានី ហ៊ុនសែន លើកឡើង​ក្នុង​ពិធី​សំណេះសំណាល​ជាមួយ​និស្សិត និង​សម្ពោធ​អគារសិក្សា​ថ្មី នៃ​សាកលវិទ្យាល័យ​អង្គរ ស្ថិតនៅ​ក្រុង​សៀមរាប នា​ថ្ងៃទី​៩ ខែឧសភា ឆ្នាំ​២០២៣​។​

​ឯកឧត្ដម​បន្ថែមថា រាជរដ្ឋាភិបាល​ដែលមាន​សម្តេច​តេ​ជោ​ជា​ប្រមុខ មានបំណង​ប្រាថ្នា​ចម្បង​តែមួយ​គត់ គឺ​ការផ្តល់ឱ្យ​ប្រជាពលរដ្ឋ​នូវ​ជីវភាព​ធូរធារ​ចម្រុងចម្រើន និង​ការរស់នៅ​ប្រកបដោយ​ភាពសុខសាន្ត​ក្រោម​ម្លប់​នៃ​សន្តិភាព ព្រម​ជាមួយនឹង​សិទ្ធិសេរីភាព និង​ឱកាស​គ្រប់បែបយ៉ាង​ក្នុង​ការកសាង​អភិវឌ្ឍ​ខ្លួន​ឱ្យទទួល​បាន​ជោគជ័យ​។

ពិតណាស់ ការ​ប្រែក្លាយ​គំនិត​ឱ្យចេញ​ជា​លទ្ធផល​ជាក់ស្តែង​ប្រកប​ដោ យ​និរន្តរភាព​នៃ​ការរីកចម្រើន គឺ​ទាមទារ​នូវ​ចក្ខុវិស័យ​វែងឆ្ងាយ និង​ច្បាស់លាស់ ក៏ដូចជា​ការប្តេជ្ញាចិត្ត​ខ្ពស់​ពី​គ្រប់ភាគី​ពាក់ព័ន្ធ​ក្នុងការ​ជម្នះ​នូវ​រាល់​គ្រប់​ឧបសគ្គ​។ ក្នុងន័យនេះ សូម​ប្រជាពលរដ្ឋ​គ្រប់​មជ្ឈដ្ឋាន ចូលរួម​ថែរក្សា និង​ប្រឹងប្រែង​ចាប់យក​ឱកាស​អំណោយផល​ពី​កត្តា​សុខសន្តិភាព ស្ថិរភាព និង​កំណើន ឱ្យ​បានជា​ប្រយោជន៍​សម្រាប់​ខ្លួន ក្រុមគ្រួសារ និង​សង្គមជាតិ​។​

​ក្រៅពី​លើកឡើង​បែបនេះ ឯកឧត្ដម​ក៏បាន​ចូលរួម​សាទរ​ចំពោះ​សាកលវិទ្យាល័យ​អង្គរ ដែល​ទទួលបាន​វិញ្ញាបនបត្រ​សម្រាប់​ឆ្នាំ​២០២២-២០២៦ ពី​គណៈកម្មាធិការ​ទទួលស្គាល់​គុណភាព​អប់រំ​នៃ​កម្ពុជា នៃ​ក្រ សួង​អប់រំ យុវជន និង​កីឡា ព្រម​ជាមួយនឹង​ការសម្ពោធ​អគារសិក្សា​ថ្មី​ដ៏​ទំនើប និង​ធំ​ស្កឹមស្កៃ​។ ទាំងនេះ គឺជា​គុណ​តម្លៃ​នៃ​ការខិតខំ​ប្រឹងប្រែង​ដ៏​សកម្ម​របស់​អ្នកឧកញ៉ា​បណ្ឌិត សៀង ណាំ​, ថ្នាក់ដឹកនាំ​សាកលវិទ្យាល័យ​អង្គរ​, សាស្ត្រាចារ្យ និង​បុគ្គលិក​សិក្សា​ទាំងអស់ នៅក្នុង​ការចូលរួមចំណែក​កសាង​ធនធានមនុស្ស និង​ការពង្រឹង​គុណភាព​អប់រំ ស្របតាម​គោលនយោបាយ​របស់​រាជ​រដ្ឋាភិបាល ហើយ​សព្វថ្ងៃ​សាកលវិទ្យាល័យ​អង្គរ ក៏មាន​ឈ្មោះ​ល្បីល្បាញ និង​ត្រូវបាន​ទទួលស្គាល់ថា ជា​សាកលវិទ្យាល័យ​ឈានមុខ​មួយ​ក្នុង​ខេត្តសៀមរាប ដែល​បណ្ដុះបណ្ដាល​មុខជំនាញ​ជាច្រើន ដោយ​រាប់​ចាប់ពី​ជំនាញ​ក្សេត្រសាស្ដ្រ ដល់​ជំនាញ​សុខាភិបាល​៕​ដោយ​៖ គង់ ឌិន​