នៅពេលដែលការព្យាយាមក្តោបក្តាប់អំណាចរវាងក្រុមមេដឹកនាំយោធាប្រជែងទាំង២ នៅក្នុងប្រទេសស៊ូដង់ បានបំផ្លិចបំផ្លាញសេចក្តីសុខនៅក្នុងភូមិរបស់គាត់ ស្ថិតក្នុងតំបន់ Darfur គោលបំណងដំបូងរបស់អ្នកស្រី Halime Yacoub Issac គឺត្រូវតែនាំកូនទាំង ៥នាក់ របស់គាត់រត់ភៀសខ្លួនទៅកាន់ប្រទេសជិតខាង ស្របពេលដែលអង្គការសហប្រជាជាតិ(UN) មើលឃើញពលរដ្ឋ ៥លាននាក់ត្រូវការជំនួយបន្ថែមទៀត។ ជម្លោះនៅស៊ូដង់ បានធ្វើឲ្យវិបត្តិនៅអាហ្វ្រិកកាន់តែលិចលង់ផងដែរ ។
ប៉ុន្តែរយៈពេល ៤ថ្ងៃក្រោយស្វែងរកទីជម្រកនៅប្រទេសឆាដ គឺជាប្រទេសមួយដែលញាំញីរួចទៅហើយដោយសារវិបត្តិមនុស្សធម៌នោះ អ្នកស្រីពុំទាន់ទទួលបានជំនួយណាមួយឡើយ ហើយអ្នកស្រីគ្រាន់តែសង្ឃឹមថា អ្នកស្រី និងកូនរបស់អ្នកស្រី នឹងមិនដាច់ពោះស្លាប់នោះទេ។
អង្គុយនៅលើដីជិតភូមិជាប់ព្រំដែន Goungourជាមួយស្ត្រីផ្សេងទៀតដែលទើបធ្វើដំណើរមកដល់ និងក្មេងៗ ដែលពួកគេមួយចំនួនគឺជាក្មេងកំព្រា អ្នកស្រី Issac និយាយប្រាប់ទីភ្នាក់ងារព័ត៌មានរ៉យទ័រថា ពួកយើងពឹងផ្អែកទាំងស្រុងលើចំណីអាហារដែលគ្រួសារពលរដ្ឋឆាដ ផ្តល់ឲ្យពួកយើង។
នៅក្បែរនោះ មនុស្សរាប់រយគ្រួសារ បានបោះជំរំក្រោមដើមឈើ ឬធ្វើទីជម្រកពីឈើ និងកម្រាលគ្រែដែលយោលតាមខ្យល់។
គួរឲ្យដឹងថា សង្គ្រាមរវាងកងទ័ពស៊ូដង់ និងកងកម្លាំងគាំទ្ររហ័ស ដែលបានផ្ទុះឡើងនៅទីក្រុង Khartoum កាលពីពេលពាក់កណ្តាលខែមេសាកន្លងទៅ បច្ចុប្បន្នបានកើតមាននៅតាមតំបន់ជាច្រើននៅក្នុងប្រទេសស៊ូដង់ ដោយបានសម្លាប់មនុស្សរាប់រយនាក់ មនុស្សរាប់ពាន់ផ្សេងទៀត រងរបួស ហើយនិងបង្កឲ្យមានគ្រោះមហន្តរាយមនុស្សធម៌។
សូមបញ្ជាក់ថា អាហ្វ្រិក បានប្រឈមរួចទៅហើយវិបត្តិមនុស្សធម៌រួចទៅហើយ បង្កឡើងដោយសារតែគ្រោះរាំងស្ងួត ទឹកជំនន់ និងជម្លោះប្រដាប់អាវុធកើនឡើង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
