ភ្នំពេញ៖ ក្នុងជំនួបពិភាក្សាជាមួយសម្តេចក្រឡាហោម ស ខេង នាយករដ្ឋមន្ត្រីស្ដីទី នៅវិមានសន្តិភាព នាថ្ងៃទី៩ ខែឧសភា ឆ្នាំ២០២៣ ឯកឧត្តម ធាវ ឈី ហាន ទេសរដ្ឋមន្ត្រី និងជារដ្ឋមន្ត្រីសម្របសម្រួលសន្តិសុខនៃសាធារណរដ្ឋសិង្ហបុរី បានកត់សម្គាល់ឃើញថា ប្រជាពលរដ្ឋកម្ពុជាបានទទួលស្វាគមន៍យ៉ាងកក់ក្តៅរាក់ទាក់ចំពោះក្រុមអត្តពលិក មកពីក្រៅប្រទេស បន្ទាប់ពីឯកឧត្តមផ្ទាល់បានទៅទស្សនកិច្ចនៅទីកន្លែងអត្តពលិកស្នាក់នៅ។
ឯកឧត្តម ក៏បានមើលឃើញការរៀបចំទទួលបដិសណ្ឋារកិច្ច កន្លែងស្នាក់នៅ មធ្យោបាយដឹកជញ្ជូន ម្ហូ បអាហារ និងកិច្ចការផ្សេងៗទៀត បានរៀបចំបានយ៉ាងល្អប្រសើរ ដែលផ្តល់ឱកាសដ៏ល្អសម្រាប់អត្តពលិកផ្ដោតសំខាន់ទៅលើការប្រកួតកីឡារបស់ខ្លួន។ ឯកឧត្ដមចាត់ទុកការប្រកួតព្រឹត្តិការណ៍កីឡាស៊ីហ្គេមនេះថា មិនត្រឹមតែជាព្រឹត្តិការណ៍សម្រាប់ការដណ្ដើមមេដាយប៉ុណ្ណោះទេ ប៉ុន្តែជាការកសាង និងពង្រឹងសាមគ្គីភាព មិត្តភាពរវាងបណ្ដាប្រទេសនៅក្នុងតំបន់អាស៊ានផងដែរ។ នេះបើតាមហ្វេសប៊ុក សម្ដេចក្រឡាហោម ស ខេង ផ្សព្វផ្សាយឱ្យដឹងនៅថ្ងៃទី៩ ខែឧសភា ឆ្នាំ២០២៣។
ឯកឧត្ដមក៏បានថ្លែងអំណរគុណសម្ដេចក្រឡាហោម និងបានចូលរួមសាទរចំពោះកម្ពុជា សម្រាប់ការធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមនេះផងដែរ។
ក្នុងជំនួបនេះ សម្ដេចក្រឡាហោម ស ខេង បានមានប្រសាសន៍ស្វាគមន៍ចំពោះវត្តមានឯកឧត្តមទេសរដ្ឋមន្ត្រី ដែលបានអញ្ជើញមកបំពេញទស្សនកិច្ចនៅកម្ពុជា នាឱកាសនៃការប្រារព្ធព្រឹត្តិការណ៍កីឡាស៊ីហ្គេមដែលកម្ពុជាបាន និងកំពុងរៀបចំធ្វើជាម្ចាស់ផ្ទះ និងបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរកម្ពុជា និងសិង្ហបុរី ដែលមានរហូតមកដល់ពេលនេះ។
សម្ដេចក្រឡាហោម ក៏បានចូលរួមអបអរសាទរ និងថ្លែងអំណរគុណចំពោះរដ្ឋាភិបាលសិង្ហបុរី ដែលបានបញ្ជូនអត្តពលិកមកចូលរួមក្នុងព្រឹត្តិការណ៍កីឡាស៊ីហ្គេមលើកទី៣២ នៅកម្ពុជានាពេលនេះ ដោយសម្ដេចបានចាត់ទុកការបញ្ជូនអត្តពលិកមកចូលរួមនេះថា ជាការឆ្លុះបញ្ចាំងឱ្យឃើញអំពីការចូលរួមគាំទ្រចំពោះកម្ពុជាដែលកំពុងប្រារព្ធនូវព្រឹត្តិការណ៍ដ៏មានសារៈសំខាន់នេះ។
ពាក់ព័ន្ធនឹងកិច្ចសហប្រតិបត្តិការក្នុងវិស័យសន្តិសុខ សម្ដេចនាយករដ្ឋមន្ត្រីស្ដីទី បានថ្លែងអំណរគុណ ចំពោះរដ្ឋាភិបាលសិង្ហបុរី ដែលកន្លងមកបានរៀបចំបើកវគ្គបណ្តុះបណ្តាលសិក្ខាសាលា ឬកិច្ចប្រជុំផ្សេងៗដោយបានផ្តល់ឱកាសឱ្យមន្ត្រីអនុវត្តច្បាប់របស់កម្ពុជាបានចូលរួម។ សម្ដេច ក៏បានជម្រាបជូនឯកឧ ត្តមទេសរដ្ឋមន្ត្រីផងដែរថា ភាគីទាំងពីរកំពុងតែពិភាក្សា ដើម្បីរៀបចំឯកសារសហប្រតិបត្តិការជាផ្លូវកា រជាមួយគ្នា។
សម្ដេចសង្ឃឹមជឿជាក់ថា ការរៀបចំឱ្យមានឯកសារសហប្រតិបត្តិការនេះ គឺជាកិច្ចការមួយដែលសមស្របទៅនឹងបរិបទបច្ចុប្បន្នដែលប្រទេសទាំងពីរ ក៏ដូចជាប្រជាជននៃប្រទេសទាំងពីរមានការធ្វើដំណើ រទៅវិញទៅមកកាន់តែច្រើនឡើង មួយវិញទៀតនោះក៏សមស្របទៅនឹងកាលៈទេសៈនៃស្ថានភាពប្រែប្រួលនៃបទល្មើសឆ្លងដែន ពិសេសបទល្មើសមិនប្រពៃណី។
ពាក់ព័ន្ធនឹងកិច្ចសហប្រតិបត្តិការលើការងារសន្តិសុខនេះ ឯកឧត្តម ធាវ ឈី ហាន ទេសរដ្ឋមន្ត្រី និងជារដ្ឋមន្ត្រីសម្របសម្រួលសន្តិសុខនៃសាធារណរដ្ឋសិង្ហបុរី បានថ្លែងអំណរគុណចំពោះសម្ដេចក្រឡា ហោម ចំពោះការជួយគាំទ្រកន្លងមកក្នុងកិច្ចសហប្រតិបត្តិការរវាងក្រសួងមហាផ្ទៃ និងស្ថាប័នពាក់ព័ន្ធរបស់សិង្ហបុរី ហើយឯកឧត្តមក៏បានឯកភាពចំពោះការលើកឡើងរបស់សម្ដេចអំពីការកើនឡើងនូវការធ្វើដំណើររវាងប្រជាជន និងប្រជាជននៃប្រទេសទាំងពីរ ដែលសមស្របក្នុងការបង្កើតឱ្យមានក្របខ ណ្ឌនៃឯកសារសហប្រតិបត្តិការ ដើម្បីថែរក្សាការពារនូវសន្តិសុខ និងសុវត្ថិភាពប្រជាពលរដ្ឋនៃប្រទេ សទាំងពីរដូចទៅនឹងអ្វីដែលសម្ដេចក្រឡាហោមបានលើកឡើង គឺរួមគ្នាដោះស្រាយនូវបញ្ហាឧក្រិដ្ឋកម្មឆ្លងដែនទាំងបទល្មើសប្រពៃណី និងមិនប្រពៃណី៕ ដោយ៖ គង់ ឌិន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
