អនុប្រធានាធិបតីចិន លោក Han Zheng បាននិយាយ ក្នុងអំឡុងដំណើរទស្សនកិច្ចរបស់លោកទៅកាន់ប្រទេសព័រទុយហ្គាល់ថា ប្រទេសចិនមានបំណងពង្រឹងកិច្ចសហប្រតិបត្តិការជាមួយប្រទេសព័រទុយហ្គាល់លើបណ្តាញថាមពលជំនាន់ថ្មីហើយនឹងគាំទ្ររដ្ឋាភិបាលព័រទុយហ្គាល់ ក្នុងការអភិវឌ្ឍថាមពលថ្មី។

លោកអនុប្រធានាធិបតីបានធ្វើការអត្ថាធិប្បាយបែបនេះ កាលពីថ្ងៃអង្គារ ក្នុងអំឡុងពេលទស្សនកិច្ចទៅកាន់មជ្ឈមណ្ឌលស្រាវជ្រាវ និងអភិវឌ្ឍន៍របស់ក្រុមហ៊ុន Redes Energeticas Nacionais (REN) ដែលជាក្រុមហ៊ុនគ្រប់គ្រងបណ្តាញថាមពលជាតិព័រទុយហ្គាល់នៅទីក្រុង Lisbon ដែលអមដំណើរដោយរដ្ឋមន្ត្រីក្រសួងថាមពល និងអាកាសធាតុ លោកស្រី Ana Fontoura Gouveia និងនាយកប្រតិបត្តិរបស់ក្រុមហ៊ុន REN លោក Rodrigo Costa។

លោក Han Zheng បានស្តាប់នូវការលើឡើងពីសមិទ្ធផលនានា ដែលមជ្ឈមណ្ឌលសម្រេចបាន ក្នុងការអភិវឌ្ឍថាមពលថ្មី ហើយបានទៅទស្សនាបន្ទប់ពិសោធន៍មួយ មុនពេលជួបសំណេះសំណាលជាមួយបុគ្គលិក។

មជ្ឈមណ្ឌល R&D កើតចេញពីការសហការរវាងកក្រុមហ៊ុនសាជីវកម្មបណ្តាញរដ្ឋរបស់ប្រទេសចិន និងក្រុមហ៊ុន REN ហើយលោក Han Zheng បាននិយាយថា នេះគឺជាសម្ព័ន្ធភាពដ៏រឹងមាំ​ជាមួយនឹង​ការទទួលបានផលប្រយោជន៍បន្ថែម ក៏ដូចជាឧទាហរណ៍ដ៏ល្អនៃកិច្ចសហប្រតិបត្តិការឈ្នះ-ឈ្នះ រវាងប្រទេសទាំង២។

របាយការណ៍របស់អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ ដែលបានចេញ​ផ្សាយ​ក្នុងខែមីនា បានលើកសរសើរដល់ការអនុវត្តផ្នែកបរិស្ថានរបស់​ព័រទុយហ្គាល់​លើការផ្តល់អនុសាសន៍ចំនួន ២៦ចំណុច ដើម្បីជួយពង្រឹងភាពស៊ីគ្នានៃគោលនយោបាយ ក្នុងការជំរុញដល់ការស្តារសេដ្ឋកិច្ចបៃតង រួមទាំងការកែលម្អឡើងវិញនូវកាកសំណល់។

ចំណែកលោក Rodrigo បានលើកឡើងថា សមិទ្ធផលរបស់មជ្ឈមណ្ឌលបានផ្តល់​អត្ថប្រយោជន៍មិនត្រឹមតែសម្រាប់ប្រទេសចិន និងព័រទុយហ្គាល់ប៉ុណ្ណោះទេ ប៉ុន្តែក៏សម្រាប់ពិភពលោកផងដែរ។ វាបានក្លាយជាវេទិកាដ៏សំខាន់សម្រាប់ការសិក្សា និងទំនាក់ទំនងថាមពលអន្តរជាតិរួចទៅហើយ៕