ប៉ាគីស្ថាន ៖ ការប៉ះទង្គិចគ្នាដោយហិង្សា បានផ្ទុះឡើងនៅក្នុងប្រទេសប៉ាគីស្ថាន រវាងកងកម្លាំងសន្តិសុខ និងអ្នកគាំទ្រ​អតីតនាយករដ្ឋមន្ត្រី លោក Imran Khan បន្ទាប់ពីរូបលោក ត្រូវបានចាប់ខ្លួន កាលពីថ្ងៃអង្គារ។

ការតវ៉ាកំពុងផ្ទុះឡើងនៅទូទាំងប្រទេស ហើយយ៉ាងហោចណាស់មនុស្សម្នាក់ បានស្លាប់ នៅក្នុងទីក្រុង Quetta។ សហរដ្ឋអាមេរិក និងចក្រភពអង់គ្លេស បានអំពាវនាវឲ្យគ្រប់គ្នាប្រកាន់ខ្ជាប់នូវគោលការណ៍ «នីតិរដ្ឋ»។

លោក Khan ត្រូវបានកម្លាំងសន្តិសុខចាប់ខ្លួននៅតុលាការជាន់ខ្ពស់ ក្នុងរដ្ឋធានីអ៊ីស្លាម៉ាបាដ។វីដេអូដែលទាក់ទាញការចាប់អារម្មណ៍ខ្លាំង បានបង្ហាញឲ្យឃើញពីមន្ត្រីរាប់សិបនាក់ធ្វើដំណើរមកដល់ ហើយឃាត់​ខ្លួន​បុរសវ័យ ៧០ឆ្នាំ ដែលត្រូវបានចាប់ដាក់ក្នុងរថយន្ត ហើយបើកចេញទៅ។ លោកកំពុងបង្ហាញខ្លួននៅតុលាការក្រោមការចោទប្រកាន់ពីបទពុករលួយ ដែលលោកនិយាយថា ជាចេតនាខាង​នយោបាយ។

សេវាកម្មទិន្នន័យចល័ត ក្នុងប្រទេសនេះ ត្រូវបានផ្អាកតាមការណែនាំរបស់ក្រសួងមហាផ្ទៃ កាលពីថ្ងៃសុក្រ ខណៈដែល​ការ​តវ៉ា បានកើនឡើងកាន់តែខ្លាំង ដែលភាគច្រើនបានកើតមាននៅមុខទីប្រជុំអគារនៃទីបញ្ជាការកងទ័ព។

រូបភាពវីដេអូពីទីក្រុង Lahore ដែលត្រូវបានបង្ហោះនៅលើបណ្ដាញសង្គម Twitter បានបង្ហាញឲ្យឃើញ​ក្រុមមនុស្ស​សម្រុក​ចូលទៅក្នុងគេហដ្ឋានរបស់មេបញ្ជាការអង្គភាពយោធា ដោយបំផ្លាញគ្រឿងសង្ហារិមនិងរបស់របរនៅខាងក្នុង៕