ហូឡង់ ៖ កាលពីថ្ងៃអង្គារ (៩ ឧសភា) នាយករដ្ឋមន្ត្រីហូឡង់ លោក Mark Rutte បានពិភាក្សាអំពី​សង្គ្រាម​នៅអ៊ុយក្រែន​ជាមួយប្រធានាធិបតី​ប្រេស៊ីល លោក Luiz Inacio Lula da Silva និងបាននិយាយថា មិនគួរមានសម្បទាន​ទាំងឡាយណា​​ដែលប៉ះពាល់ដល់អធិបតេយ្យភាពអ៊ុយក្រែននោះទេ។

លោក Lula បាននិងកំពុងតស៊ូមតិលើការបង្កើតក្រុមប្រទេសមិនពាក់ព័ន្ធក្នុងសង្គ្រាម ដែលអាចសម្របសម្រួល​ការចរចាសន្តិភាព​ដើម្បីបញ្ចប់ជម្លោះ និងបានស្នើឱ្យមានសម្បទានពីភាគីទាំងពីរ។ លោក Rutte ដែលស្ថិតក្នុងដំណើរ​ទស្សនកិច្ចរយៈពេល​បីថ្ងៃទៅកាន់ប្រទេសប្រេស៊ីល បានដាក់ចេញនូវគោលជំហរអឺរ៉ុបទាក់ទង​នឹងភាពចាំបាច់​ក្នុងការការពារ​អ៊ុយក្រែនពីការវាយលុក​របស់រុស្ស៊ី។

មេដឹកនាំប្រេស៊ីលបានទទូចថាការចរចាសន្តិភាពគឺចាំបាច់ដើម្បីបញ្ឈប់ការប្រយុទ្ធគ្នា ដោយកត់សម្គាល់​ថាប្រេស៊ីល​បាន​បោះឆ្នោតគាំទ្រសេចក្តីសម្រេចរបស់អង្គការសហប្រជាជាតិក្នុងការថ្កោលទោសការវាយលុករបស់រុស្ស៊ី។

លោក Rutte កំពុងបំពេញទស្សនកិច្ចនៅប្រទេសប្រេស៊ីល អមដោយគណៈប្រតិភូធុរកិច្ច​សម្រាប់កិច្ចពិភាក្សា​ដែលផ្តោតលើពាណិជ្ជកម្ម ព្រមទាំងកិច្ចសហប្រតិបត្តិការសម្រាប់កសិកម្មប្រកបដោយចីរភាព និងការផ្លាស់ប្តូរថាមពល ជាពិសេសឧស្ម័នអ៊ីដ្រូសែន។ លោកបានសរសើរកិច្ចខិតខំប្រឹងប្រែងរបស់ប្រទេស​ប្រេស៊ីលក្នុងការប្រយុទ្ធប្រឆាំង​នឹងបម្រែបម្រួលអាកាសធាតុ៕