​

កាលពី​ថ្ងៃ​អង្គារ (៩ ឧសភា​) ក្រុម​កសិករ​នៅ​តំបន់ Catalonia ភាគ​ឦសាន​នៃ​ប្រទេស​អេ​ស្ប៉ា​ញ បានធ្វើ​ការតវ៉ា​ដោយ​បើក​ត្រាក់ទ័រ​យឺតៗ ក្នុងការ​ទាមទារ​ឱ្យ​រដ្ឋាភិបាល​ជួយ​ដោះស្រាយ​ផលប៉ះពាល់​នៃ​គ្រោះរាំងស្ងួត​លើដី​ចម្ការ​របស់​ពួកគេ មួយថ្ងៃ​បន្ទាប់ពី​ទីភ្នាក់ងារ​អាកាសធាតុ​ជាតិ​អេ​ស្ប៉ា​ញ AEMET បាន​បញ្ជាក់ថា ខែមេសា​ឆ្នាំនេះ​គឺជា​ខែ​ដែលមាន​អាកាសធាតុ​ស្ងួត​ខ្លាំង​និង​ក្តៅ​បំផុត ចាប់តាំងពី​កំណត់ត្រា​អាកាសធាតុ​ប្រចាំខែ​បានចាប់ផ្តើម​នៅ​ឆ្នាំ១៩៦១​មក។​

​កម្រិត​ទឹកជា​មធ្យម​នៅក្នុង​អាង​ស្តុក​ទឹក​នៅ​តំបន់ Catalonia និង Andalusia ដែលជា​តំបន់​រងគ្រោះ​ខ្លាំងជាងគេ​គឺ​ស្ថិតនៅ​ប្រហែល ២៥% ។ សហជីព​កសិករ Unio de Pagesos កំពុង​ជំរុញ​ឱ្យ​ក្រុម​អាជ្ញាធរ​ផ្តល់​ធន​បម្រុង និង​ការលើកទឹកចិត្ត​ការបង់​ពន្ធ​កម្លាំង​ពលកម្ម ព្រមទាំង​ធ្វើការ​កែលម្អ​បណ្តាញ​ស្រោចស្រព​បន្ទាន់ ដើម្បី​ធានា​ការផ្គត់ផ្គង់​ទឹក​អប្បបរមា​សម្រាប់​កសិក​រ​។​

​លោក Josep Andreu Cortina កសិករ​វ័យ ៣៥ ឆ្នាំ​ម្នា​ក់បាន​ប្រាប់​សារព័ត៌មាន​រ៉​យ​ទ័​រថា លោក​រំពឹងថា​នឹង​អាច​លក់បាន​ត្រឹមតែ ២% ប៉ុណ្ណោះ​នៃ​កសិផល​របស់ខ្លួន​ដោយសារតែ​កង្វះខាត​ទឹក​។​

​លោក​បាន​និយាយ​ក្នុងការ​តវ៉ា​នៅ​ទីក្រុង Lleida ពេលដែល​លោក​ឈរ​ក្បែរ​ត្រាក់ទ័រ​របស់ខ្លួន​ថា "​រដ្ឋាភិបាល ត្រូវតែ​ជួយ​យើង​ឥឡូវនេះ ក្នុង​ផ្តល់​វិធានការ​ដ៏​មាន​ប្រសិទ្ធភាព​មួយចំនួន​ដល់​ពួកយើង ដើម្បី​ដោះស្រាយ​វិបត្តិ​ដែល​យើង​កំពុង​ជួបប្រទះ​នាពេល​បច្ចុប្បន្ននេះ "៕​