យន្តហោះអារ៉ាប៊ីសាអូឌីតមួយគ្រឿង ដែលដឹកស្បៀងអាហារ ឱសថ និងឧបករណ៍ផ្គត់ផ្គង់ទីជំរក ប្រមាណ ២០តោន បានចុះចតនៅកំពង់ផែ ផត ស៊ូដាន កាលពីល្ងាចថ្ងៃអង្គារ (៩ ឧសភា) ខណៈដែលប្រទេសនេះ ធ្លាក់ចូលទៅក្នុងសង្រ្គាមដែលអូសបន្លាយជាងបីសប្តាហ៍។

ក្រុមសាក្សីបាននិយាយថា ការប្រយុទ្ធគ្នានៅក្នុងរដ្ឋធានីរបស់ប្រទេសស៊ូដង់មានសន្ទុះកើនឡើងខ្លាំងនៅថ្ងៃពុធ (១០ ឧសភា)នេះ ដោយមានការប៉ះទង្គិចគ្នាដ៏ខ្លាំងក្លា និងការវាយប្រហារតាមអាកាស ខណៈដែលគណៈប្រតិភូនៃក្រុមយោធាគូប្រជែងបានបន្តកិច្ចពិភាក្សានៅក្នុងប្រទេសអារ៉ាប៊ីសាអូឌីតក្នុងគោលបំណងធានាបាននូវបទឈប់បាញ់ និងផ្តល់ជំនួយមនុស្សធម៌។

ក្រុមអ្នកស្រុកបានរាយការណ៍ពីការប្រយុទ្ធគ្នានៅក្នុងតំបន់ជាច្រើននៃរដ្ឋធានី Khartoum រវាងកងទ័ព និងកងកម្លាំងគាំទ្ររហ័សយោធាប៉ារ៉ា (RSF) ព្រមទាំងការប្រយុទ្ធគ្នាយ៉ាងខ្លាំងក្លានៅភាគខាងជើងនៃទីក្រុង Omdurman និងភាគខាងកើតនៃតំបន់ Bahri ជាទីក្រុងជាប់គ្នាពីរដែលខណ្ឌចេញពីរដ្ឋធានី Khartoum ដោយទន្លេនីល។

ជម្លោះនេះបានបង្កើតឲ្យមានវិបត្តិមនុស្សធម៌នៅក្នុងប្រទេសធំទីបីរបស់ទ្វីបអាហ្រ្វិកនេះ ដោយបានបង្ខំឲ្យមនុស្សជាង ៧០០.០០០ នាក់ភៀសខ្លួននៅក្នុងប្រទេស និងជំរុញឱ្យមនុស្ស ១៥០.០០០នាក់ ភៀសខ្លួនទៅកាន់បណ្ដារដ្ឋជិតខាង។ វាក៏បានបង្កឱ្យមានភាពចលាចលនៅក្នុងតំបន់ Darfur ភាគខាងលិចប្រទេសស៊ូដង់ផងដែរ៕