​បាល់ទាត់៖ ​ក្របខ័ណ្ឌ​បាល់ទាត់​កំពូល​អង់គ្លេស Premier League បាន​ចេញ​សេចក្តីថ្លែងការ​ណ៍​ទាក់​ទង​នឹង​ការ​វិល​ត្រឡប់​របស់​អ្នកគាំទ្រ​ មកកាន់​ពហុ​កីឡដ្ឋាន​វិញ​នៅ​ថ្ងៃ​ពុធ​ម្សិលមិញ​នេះ​។ ​បន្ទាប់ពី​ការ​ផ្ទុះ​ឡើង​នៃ COVID-19 នៅ​ចក្រភព​អង់គ្លេស​នៅ​ដើមឆ្នាំ២០២០ រាល់​បាល់ទាត់​នៅក្នុង​ប្រទេស​ត្រូវ​បាន​ពន្យា​រ​ពេល​ក្នុង​ខែមីនា ​ហើយ​មិនបាន​បន្ត​រហូតដល់​ខែមិថុនា​។

ចុង​បញ្ចប់​នៃ​រដូវ​កាល ២០១៩/២០ បាត់​ទាត់​ក៏​ចាប់ដំណើរការ​ឡើងវិញ​ ដោយ​មិន​អនុញ្ញាតអោយ​អ្នកគាំទ្រ​ចូល​ទស្សនា​ឡើយ​។​ ​ក្រោយមក​យុទ្ធនា​ការប្រកួត​រដូវ​កាល ២០២០/២១ បានចាប់ផ្តើម​នៅ​ក្នុង​ខែកញ្ញា​ដោយ​រាល់​ការប្រកួត​ទាំងអស់ ​នៅតែ​ត្រូវបាន​លេង​នៅក្នុង​ពហុ​កីឡដ្ឋាន​ទទេ​។ អ្នក​គាំទ្រ​ក្រោយមក​ក៏ត្រូវ​បានអនុញ្ញាត​សារជាថ្មី​ អោយចូល​ទស្សនា​វិញក្នុង​ចំនួន​កំណត់ ​អាស្រ័យ​លើ​តំបន់​ដែលមាន​កំរិត​ហា​នី​ភ័យ ​ឆ្លង​ពី​ទាប​ទៅ​ខ្ពស់​។ ​មកដល់​ថ្ងៃ​ពុធ​ម្សិល​មិញ Premier League បាន​សំរេច​ក្នុង​ការបើក​ អោយ​អ្នកគាំទ្រ​ត្រលប់​មកវិញ​សារជាថ្មី​នៅ ពីរ​សប្តាហ៍​ចុងក្រោយ​នៃ​ក្រប​ខណ្ឌ English Premier League រដូវ​កាល​នេះ​ក្នុង​ចំនួន​មានកំណត់ និង​អនុញ្ញាត​អោយតែអ្នកគាំទ្រ​ក្នុង​ទឹកដី​ប៉ុណ្ណោះ​។ ​សប្តាហ៍​ទី៣៧ នឹងធ្វើ​នៅ​ចុង​សប្តាហ៍​ថ្ងៃទី ១៨-១៩ ខែឧសភា​នេះ និង​សប្តាហ៍​ចុង​ក្រោយ​ទី​៣៨ នៅ​ថ្ងៃអាទិត្យ​តែមួយ​ថ្ងៃ​នៅ​ថ្ងៃ​ទី​២៣ ខែ​ដដែល​នេះ​។

​​Manchester City ដែល​ជា​ក្រុម​កំពូល​តារាង​នឹង​អាច​លើក​ពាន Premier League នៅ​ចំពោះមុខ​អ្នក​គាំទ្រ​របស់​ខ្លួន​ នៅ​សប្តាហ៍​ចុងក្រោយ​នៅពេល​ទទួលភ្ញៀវ Everton​។ ​ជាមួយគ្នា​នោះដែរ FA ក៏មាន​គម្រោង​បើក​អោយ​អ្នកគាំទ្រ ​ចូល​ទស្សនា​វគ្គ​ផ្តាច់ព្រ័ត្រ FA Cup ថ្ងៃទី១៥ ខែឧសភា​នេះដែរ បន្ទាប់ពី​អ្នកគាំទ្រ ៤០០០នាក់​បាន​ចូល​ទស្សនា​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​រវាង Leicester City និង Southampton នៅ Wembley ហើយ​អ្នកគាំទ្រ ៨០០០នាក់​ក៏បាន​ចូល​ទស្សនា​ផ្ទាល់​វគ្គ​ផ្តាច់ព្រ័ត្រ Carabao Cup ដែល Manchester City យកឈ្នះ Spurs ផងដែរ​៕

​អត្ថបទ​៖​នាង សុភា​វុ​ធ