ប្រទេសចិនបានបាញ់បង្ហោះយានអវកាសផ្ទុកទំនិញ Tianzhou-6 ដោយជោគជ័យដោយប្រើយានចម្លង Long March-7 Y7 ពីទីតាំងបាញ់បង្ហោះយានអវកាស Wenchang ក្នុងខេត្តកោះ Hainan ភាគខាងត្បូងប្រទេសចិន នៅវេលាម៉ោង ៩:២២នាទីយប់ ម៉ោងនៅទីក្រុងប៉េកាំង (ត្រូវនឹងម៉ោង ២១:២២នាទី ម៉ោងសកល) កាលពីថ្ងៃពុធ។

ទីភ្នាក់ងារអវកាសចិន (CMSA) បានឲ្យដឹងថា យានផ្ទុកទំនិញនេះ បានចូលទៅក្នុងគន្លងវិថី ដែលបានកំណត់ប្រមាណជា ១០នាទី បន្ទាប់ពីការបាញ់បបង្ហោះនោះ ដោយ CMSA បញ្ជាក់បន្ថែមថា យាន Tianzhou-6 កំពុងដំណើរការទៅតាមការគ្រោងទុក ហើយនឹងចូលចតនៅស្ថានីយអវកាសចិន។

គោលបំណងចម្បងរបស់យាន Tianzhou-6 គឺដើម្បីផ្តល់ការ​ផ្គត់ផ្គង់​ស្បៀងសំខាន់ៗ និង​ឈុតអវកាស​ទៅ​អ្នកអវកាស ​ដែលពេលនេះកំពុងស្ថិតនៅក្នុងស្ថានីយអវកាសចិន ដែលត្រូវបាន​គេស្គាល់ថា​ជាក្រុមនាវិក Shenzhou-15។

លើសពីនេះ យានផ្ទុកទំនិញ ក៏នឹងដឹកជញ្ជូនសមាសធាតុថែទាំ ​សម្ភារៈប្រើប្រាស់ និង​ឧបករណ៍ជំរុញ ដើម្បីជួយគាំទ្រដល់ប្រតិបត្តិការរបស់ស្ថានីយអវកាសផងដែរ។

បើប្រៀបធៀបទៅនឹងយានជំនាន់មុន Tianzhou-5 យាន Tianzhou-6 នេះ ​មាន​ទម្ងន់ធ្ងន់ខ្លាំង ដោយ​ធ្វើឲ្យមានទីកន្លែងទំនេរធំ ​និងសមត្ថភាពផ្ទុកច្រើនជាងមុន។

វាជាយានដឹកទំនិញជំនាន់ថ្មីដំបូងបង្អស់របស់ប្រទេសចិន​ ពោលគឺចាប់ពី Tianzhou-6 ទៅ Tianzhou-11 ដើម្បីបង្កើនសមត្ថភាពដឹកជញ្ជូនរបស់វាពី ៦,៩តោន ដល់ ៧,៤តោន៕