នគរបាលអ៊ីតាលីបានចាប់ខ្លួនសមាជិកជាប់សង្ស័យចំនួន ៦១នាក់បន្ថែមទៀត នៃក្រុមឧក្រិដ្ឋកម្ម Ndrangheta ដ៏មានឥទ្ធិពលបំផុតរបស់ប្រទេសអ៊ីតាលី នៅក្នុងការវាយឆ្មក់ជាបន្តបន្ទាប់នៅទូទាំងតំបន់ចំនួនប្រាំពីរ។ ពួកគេត្រូវបានសង្ស័យពីបទឧក្រិដ្ឋនានា រួមទាំងការក្លែងបន្លំ ការជួញដូរគ្រឿងញៀន ការជ្រៀតជ្រែកចូលរដ្ឋាភិបាល និងជំរិតទារប្រាក់ពីក្រុមកសិករក្នុងតំបន់។

មន្ត្រីនគរបាលជាង ៥០០នាក់ បានចូលរួមក្នុងប្រតិបត្តិការនេះ ដែលកំណត់គោលដៅលើមនុស្សសរុប១៦៧នាក់ រួមទាំងមនុស្សរាប់សិបនាក់ ដែលកំពុងជាប់ពន្ធនាគារផងដែរ។

កាលពីសប្តាហ៍មុន មនុស្សជាង ១០០នាក់ ត្រូវបានចាប់ខ្លួននៅទូទាំងទ្វីបអ៊ឺរ៉ុប នៅក្នុងប្រតិបត្តិការដ៏ធំបំផុតមិនធ្លាប់មានដែលបានធ្វើឡើងប្រឆាំងនឹងក្រុមឧក្រិដ្ឋកម្ម Ndrangheta។

ប្រទេសចំនួន ១០ បានជាប់ពាក់ព័ន្ធនឹងករណីនេះ ហើយទ្រព្យសម្បត្តិមានតម្លៃ ២៥លានអឺរ៉ូ (២២ លានផោន) ត្រូវបានរឹបអូស។

នេះគ្រាន់តែជាក្រុមឧក្រិដ្ឋកម្មមួយក្នុងចំណោមក្រុមឧក្រិដ្ឋកម្មចំនួន ១៥០ក្រុម ដែលបង្កើតជាផ្នែកមួយនៃបណ្តាញឧក្រិដ្ឋកម្មរបស់ក្រុម Ndrangheta ដែលមានឥទ្ធិពលខ្លាំងជាងក្រុម Cosa Nostra ជាក្រុមម៉ាហ្វ្យា(Mafia) ដ៏មានឥទ្ធិពលបំផុតនៅក្នុងប្រទេសនេះ និងធ្វើប្រតិបត្តិការនៅក្នុងប្រទេសជាង៤០ ជុំវិញពិភពលោក។

ក្រុមអ្នកស៊ើបអង្កេតអ៊ីតាលី និងបែលហ្ស៊ិកជឿថា ក្រុមឧក្រិដ្ឋកម្មនេះ បានរត់ពន្ធគ្រឿងញៀនកូកាអ៊ីនជិត ២៥.០០០គីឡូក្រាម ក្នុងចន្លោះ ខែតុលា ឆ្នាំ ២០១៩ ដល់ខែមករា ឆ្នាំ ២០២២ ហើយបានដឹកជញ្ជូនទឹកប្រាក់ច្រើនជាង ២២ លានអឺរ៉ូពី Calabria ទៅបែលហ្សិក ហូឡង់ និងអាមេរិកខាងត្បូង៕