ភ្នំពេញ ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអនុញ្ញាតឱ្យឯកឧត្តម Petr Gandalovic ​ប្រធាននាយកដ្ឋានសហប្រតិបត្តិការអភិវឌ្ឈន៍ និងជំនួយមនុស្សធម៌ នៃក្រសួងការបរទេសសាធារណរដ្ឋ ឆែក ចូលជួបសវនាការ និងពិភាក្សាការងារ ក្នុងឱកាសឯកឧត្តម និងគណៈប្រតិភូអញ្ជើញមកបំពេញ​ទស្សនកិច្ច​នៅកម្ពុជា, នារសៀលថ្ងៃទី១១ ខែឧសភា ឆ្នាំ២០២៣នេះ នៅទីស្ដីការក្រសួងសុខាភិបាល។

​ជាកិច្ចចាប់ផ្តើម ឯកឧត្តមរដ្ឋមន្ត្រីក្រសួងសុខាភិបាល បានសម្ដែងមនោសញ្ចេតនាស្វាគមន៍យ៉ាងកក់ក្តៅចំពោះ ឯកឧត្តមប្រធានប្រតិភូ និងថ្លែងអំណរគុណចំពោះរដ្ឋាភិបាល និងប្រជាជនឆែក ដែលបានចូលរួមចំណែក​គាំទ្រវិស័យ​សុខាភិបាល តាមរយៈគម្រោងមួយចំនួនដូចខាងក្រោម៖ អនុស្សរណៈយោគយល់គ្នា រវាង​ក្រសួងសុខាភិបាល នៃព្រះរាជាណាចក្រកម្ពុជា និងស្ថានទូតនៃសាធារណរដ្ឋឆែក ស្តីពីការគាំពារសុខភាពទារក នៃមន្ទីរពេទ្យកុមារជាតិ។ គម្រោងសហប្រតិបត្តិការជាមួយវិទ្យាស្ថានជាតិសុខភាពសាធារណៈ ស្តីពី Finding Ways to Strengthen Infection Prevention and Control in Hospital Settings Through Improved Access to Safe and Quality Water, Sanitation and Hygiene។ គម្រោងសាងសង់មណ្ឌលសុខភាពចំនួន ០៣ គឺមណ្ឌលសុខភាព រាមអណ្តើក មណ្ឌលសុខភាព ធ្លាប្រជុំ និងមណ្ឌលសុខភាពត្រពាំងក្រញូង និងអគារសម្ភពក្នុងមន្ទីរពេទ្យ​បង្អែក​កោះអណ្ដែត និងការបណ្តុះបណ្តាលមន្ត្រីសុខាភិបាលខេត្តតាកែវ ដោយការប្រើប្រាស់​ថវិកាបង្វែរពីបំណុល​របស់កម្ពុជា ទៅជាជំនួយឥតសំណង។ គម្រោងផ្តល់សម្ភារបរិក្ខារឧបករណ៍វេជ្ជសាស្ត្រ សម្រាប់ជួយសង្គ្រោះ​ជីវិត​ទារកទើបនឹងកើត រួមទាំងការបណ្តុះបណ្តាល ជូនមន្ទីរពេទ្យកុមារជាតិ។ គម្រោងផ្តល់សម្ភារបរិក្ខារឧបករណ៍វេជ្ជសាស្ត្រ សម្រាប់ប្រយុទ្ធ នឹងជំងឺកូវីដ-១៩ នៅតាមមូលដ្ឋានសុខាភិបាល​សាធារណៈមួយចំនួននៅក្នុងខេត្តកំពង់ឆ្នាំង។

ឯកឧត្តម Petr Gandalovic ប្រធានប្រតិភូ បានថ្លែងអបអរសាទរ និងកោតសរសើររាជរដ្ឋាភិបាលកម្ពុជា ក្នុងកិច្ចខិតខំ​ប្រឹងប្រែង​គ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជា ក្នុងរយៈពេលជាង២ឆ្នាំ​កន្លងមកនេះបាន​ទទួលជោគជ័យ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំ ចង្អុលបង្ហាញផ្ទាល់ ដែលអាចឱ្យកម្ពុជា​បើក​ដំណើរការប្រទេសទាំងសកម្មភាពសេដ្ឋកិច្ច និងសង្គមឡើងវិញតាំង ពីខែវិច្ឆិកា ឆ្នាំ២០២១។

ជាចុងបញ្ចប់ ឯកឧត្តមរដ្ឋមន្ត្រី ក៏បានសម្តែងអំណរគុណយ៉ាងជ្រាលជ្រៅជាថ្មីម្តងទៀត ចំពោះការជួយឧបត្ថម្ភ​គាំទ្ររបស់រដ្ឋាភិបាល និងប្រជាជនឆែក ដែលបានចូលរួមចំណែកអភិវឌ្ឍន៍វិស័យសុខាភិបាល ឱ្យមានការ​រីកចម្រើនរហូតមកដល់បច្ចុប្បន្ន ក្នុងស្មារតីសាមគ្គីភាព មិត្តភាពជាប្រពៃណី និងកិច្ចសហ​ប្រតិបត្តិការរវាង​ប្រទេសទាំងពីរ៕ ដោយ ៖ រដ្ឋា