មេដឹកនាំកោះតៃវ៉ាន់ លោកស្រី Tsai Ing-wen បាននិយាយនៅថ្ងៃព្រហស្បតិ៍នេះថា លោកស្រីសង្ឃឹមថា ស្ត្រីច្រើនបន្ថែមទៀតនឹងចូលរួមហ្វឹកហាត់កងកម្លាំងបម្រុងរបស់កោះមួយនេះ ដូច្នេះប្រជាជននឹងអាចការពារទឹកដីរបស់ពួកគេ។

លោកស្រី Tsai បានចុះពិនិត្យជំរំហ្វឹកហ្វឺនកងកម្លាំងបម្រុងនៅថ្ងៃព្រហស្បតិ៍នេះ នៅទីក្រុង Taoyuan ជាទីដែលក្រុមទាហានបម្រុងស្ត្រីទី១ ត្រូវបានអនុញ្ញាតឲ្យចូលរួមដោយស្ម័គ្រចិត្តក្នុងការបណ្តុះបណ្តាលជាលើកដំបូង។

លោកស្រី Tsai និយាយថា កោះតៃវ៉ាន់កំពុងស្ថិតលើខ្សែត្រៀមជួរមុខនៃការការពារលទ្ធិប្រជាធិបតេយ្យ។ យើងត្រូវតែរួបរួមគ្នា ហើយសូមឲ្យពិភពលោកមើលឃើញការប្តេជ្ញាចិត្តរបស់យើងដើម្បីការពារទឹកដីបស់យើងដោយការរួមបញ្ចូលគ្រប់ភេទទាំងអស់។

បច្ចុប្បន្ននេះ រដ្ឋាភិបាលកោះតៃវ៉ាន់កំពុងធ្វើការកែទម្រង់ការបណ្តុះបណ្តាលកងកម្លាំងបម្រុងដើម្បីបង្កើន ការហ្វឹកហាត់ដែលប្រែប្រួលនិងរយៈពេលវែង ដើម្បីបង្ហាញពីសេណារីយ៉ូសង្គ្រាមដ៏មានសក្តានុពលយ៉ាងជាក់ច្បាស់បន្ថែមទៀត។

ការជំរុញនេះ បានធ្វើឡើងក្នុងពេលដឹងពីការគំរាមកំហែងដែលកើនឡើងខ្ពស់នៅកោះតៃវ៉ាន់ ដែលបានឃ្លាំមើលយ៉ាងដិតដល់ពីវិបត្តិនៅអ៊ុយក្រែន ហើយគឺជាគោលដៅនៃយោធាដែលត្រូវបានបង្កើនឡើង និងឥរិយាបថពាក្យសំដីរបស់ប្រទេសចិនក្នុងរយៈពេលប៉ុន្មានឆ្នាំថ្មីៗនេះ។