ការថយចុះនៃចំនួនទារកដែលកើតនៅក្នុងប្រទេសចិនជំរុញឲ្យក្រុមហ៊ុនផលិតផលិតផលកុមារ កំណត់គោលដៅលើសពីការផលិតដបទឹកដោះគោ រទេះទារក និងរទេះរុញ ដើម្បីឲ្យអាជីវកម្មរបស់ពួកគេបន្តមានស្ថិរភាព។

អ្នកស្រី Yan Zhang ស្ថាបនិកនិងជានាយកប្រតិបត្តិនៃយីហោសម្លៀកបំពាក់កុមារសៀងហៃ NATUNAKIDS បាននិយាយថា ការធ្លាក់ចុះទាបនៃអត្រាកំណើតមិនទាន់មានផលប៉ះពាល់ខ្លាំងដល់អាជីវកម្មរបស់ខ្លួននៅឡើយទេ ប៉ុន្តែអ្នកស្រីរំពឹងថាការលក់នឹងធ្លាក់ចុះក្នុងរយៈពេល ៣ ទៅ ៥ ឆ្នាំខាងមុខ។

ប្រទេសចិនបានធ្លាក់ខ្លួនចូលក្នុងរណ្តៅប្រជាសាស្ត្រមួយយ៉ាងធំ តាមរយៈគោលនយោបាយកូនតែមួយរបស់ខ្លួនដែលបានដាក់ចេញនៅចន្លោះឆ្នាំ១៩៨០ និង ២០១៥។ ក្រុមអាជ្ញាធរបានបង្កើនដែនកំណត់នៃការមានកូនដល់ចំនួនបីនាក់នៅឆ្នាំ ២០២១ ប៉ុន្តែសូម្បីតែក្នុងអំឡុងពេលស្នាក់នៅក្នុងផ្ទះដោយសារជម្ងឺកូវីដ១៩ក៏ដោយ ក៏គូស្វាមីភរិយានៅតែស្ទាក់ស្ទើរក្នុងការមានកូន។

ចំនួនប្រជាជនរបស់ប្រទេសនេះបានធ្លាក់ចុះជាលើកដំបូងកាលពីឆ្នាំមុនក្នុងរយៈពេលប្រាំមួយទសវត្សរ៍ ជាព្រឹត្តិការណ៍ដ៏សំខាន់មួយដែលត្រូវបានគេរំពឹងថានឹងបណ្តាលឱ្យមានការថយចុះរយៈពេលវែងនៃចំនួនប្រជាជន។

ខណៈដែលប្រទេសចិន ប្រគល់តំណែងរបស់ខ្លួនជាប្រទេសដែលមានប្រជាជនច្រើនជាងគេបំផុតរបស់ពិភពលោកទៅឱ្យប្រទេសឥណ្ឌានៅឆ្នាំនេះ អ្នកវិភាគទីផ្សារ លោក Shaun Rein បានព្រមានអំពីទស្សនវិស័យមិនល្អសម្រាប់ឧស្សាហកម្មទារក៕