លោកនាយករដ្ឋមន្ត្រីអ៊ីស្រាអែល Benjamin Netanyahu បាននិយាយកាលពីយប់ថ្ងៃព្រហស្បតិ៍ថា យុទ្ធនាការយោធារបស់អ៊ីស្រាអែល នៅក្នុងតំបន់ ហ្គាហ្សានឹងបន្តទៀត ក្នុងករណីចាំបាច់ ស្របពេលអំពើហិង្សាពុះ​កញ្ជ្រោល​កាន់តែខ្លាំង រវាងអ៊ីស្រាអែល និង ប៉ាឡេស្ទីន ក្នុងពេលជាច្រើនខែមកនេះ។

លោក Netanyahu បានធ្វើអត្ថាធិប្បាយបែបនេះ បន្ទាប់ពីការវាយតម្លៃផ្នែកសន្តិសុខនៅក្នុងក្រសួងការពារជាតិក្នុងទីក្រុង Tel Aviv ជាមួយរដ្ឋមន្ត្រីការពារជាតិលោក Yoav Gallant ប្រធានទីភ្នាក់ងារចារកម្ម Shin Bet លោក Ronen Bar ប្រមុខកងទ័ព លោក Herzi Halevi និង ក្រុមមន្ត្រីផ្នែកសន្តិសុខជាន់ខ្ពស់ជាច្រើនរូបទៀត។

យោងតាមសេចក្ដីថ្លែងការណ៍ដែលបានចេញជំនួសមុខឲ្យយុទ្ធនាការរបស់ខ្លួន លោក Netanyahu និង លោក Gallant បានណែនាំកងទ័ព និងទីភ្នាក់ងារចារកម្ម Shin Bet ក្នុងការបន្តការទប់ទល់​នឹងការសងសឹកដ៏ធ្ងន់ធ្ងរពីក្រុមអ៊ីស្លាមជីហាតប៉ាឡេស្ទីន ។

កិច្ចខិតខំប្រឹងប្រែងដើម្បីចរចាស្វែងរកបទឈប់បាញ់ដោយប្រទេសអេហ្ស៊ីប ដែលជារឿយៗធ្វើ​ជាអ្នក​សម្របសម្រួលរវាងប៉ាឡេស្ទីន​ និងអ៊ីស្រាអែល​ នៅមិនទាន់បានចេញជាលទ្ធផលនៅឡើយ។

យោងតាមអាជ្ញាធរសុខាភិបាលក្នុងតំបន់ហ្គាហ្សា ជនជាតិប៉ាឡេស្ទីន ២៩នាក់ បានស្លាប់ចាប់តាំង​ពី​ការចាប់ផ្ដើមវាយប្រយុទ្ធគ្នាមកក្នុងនោះមានកុមារ៦នាក់ ​ស្ត្រី៣នាក់ និងមនុស្ស៩៣នាក់ផ្សេង​ទៀត​បានរងរបួសរួមទាំងកុមារ៣២នាក់ និងស្រ្តី១៧នាក់៕