លោក Reuben Brigety គឺជាឯកអគ្គរដ្ឋទូតសហរដ្ឋអាមេរិកប្រចាំនៅអាហ្វ្រិកខាងត្បូង បានចោទប្រកាន់ប្រទេសមួយនេះថា បានផ្តល់អាវុធដល់ប្រទេសរុស្ស៊ី តាមរយៈនាវាដឹកទំនិញ​ពាក់ព័ន្ធនឹងក្រុមហ៊ុនរងទណ្ឌកម្មដែលបានចូលចតដោយសម្ងាត់នៅមូលដ្ឋានកងទ័ពជើងទឹកនៅជិតទីក្រុង Cape Town កាលពីខែធ្នូ ឆ្នាំ ២០២២កន្លងទៅ ។

ប្រធានាធិបតីអាហ្វ្រិកខាងត្បូង លោក Cyril Ramaphosa និយាយថា ការស៊ើបអង្កេតជុំវិញការធ្វើ​ដំណើរ​របស់នាវារុស្ស៊ី Lady R ចូលមូលដ្ឋានកងទ័ពជើងទឹកសំខាន់​ប្រទេសរបស់លោក ត្រូវបាន​ធ្វើឡើងរួចហើយដោយពុំបានប្រកាសជាសាធារណៈដោយមានជំនួយពីសេវាកម្មចារកិច្ចសហរដ្ឋអាមេរិក ។

លោកថា ការស៊ើបអង្កេត បានចាប់ផ្តើមមុនពេលលោក Brigetyចេញមុខបកស្រាយ​ជា​សាធារណៈក្នុងសន្និសីទ​សារព័ត៌មាន នៅរដ្ឋធានី Pretoria របស់អាហ្វ្រិកខាងត្បូងថា ទំនិញគឺជាអាវុធ និងគ្រាប់រំសេវ ។

លោក Pretoria និយាយថា សហរដ្ឋអាមេរិកប្រាកដច្បាស់ថា គ្រឿងយុទ្ធោបករណ៍ បានផ្ទុកលើនាវា Lady R នៅមូលដ្ឋានកងទ័ពជើងទឹក Simon's Town ចន្លោះថ្ងៃទី ៦ និងថ្ងៃទី ៨ ខែធ្នូ ហើយក្រោយមក វាត្រូវបានដឹកជញ្ជូនទៅកាន់ប្រទេសរុស្ស៊ី ។

លោកនិយាយថា រឿងនេះរុញឲ្យមានការសួរដេញដោលពីគោលជំហរអព្យាក្រិត្យរបស់​អាហ្វ្រិក​ខាងត្បូងលើសង្រ្គាមនៅអ៊ុយក្រែន ​និងការអំពាវនាវរបស់ពួកគេឲ្យបញ្ចប់ជម្លោះ ។

នៅក្នុងសេចក្តីអធិប្បាយដែលបានចុះផ្សាយដោយសារព័ត៌មានជាច្រើនរបស់អាហ្វ្រិកខាងត្បូង លោក Brigety និយាយថា ការផ្តល់អាវុធដល់រុស្ស៊ី គឺជារឿងធ្ងន់ធ្ងរខ្លាំងណាស់ ហើយពួកយើងមិន​យល់ឃើញថា បញ្ហាមួយត្រូវបានដោះស្រាយនោះទេ ។

បើសិនជាអាហ្វ្រិកខាងត្បូង ត្រូវបានគេរកឃើញថា បានផ្តល់ជំនួយយោធាដល់រុស្ស៊ីពិតមែន វានឹងគំរាមកំហែង​ដល់ការបែកបាក់ទំនាក់ទំនងរវាងសហរដ្ឋអាមេរិក និងប្រទេសដៃគូសំខាន់​នៅអាហ្វ្រិកមួយនេះ ៕