ក្រុមអាជ្ញាធរអន្តោប្រវេសន៍កាតេម៉ាឡា និយាយថា ជើងហោះហើរ ៣វ៉ុលដឹកជនអន្តោប្រវេសន៍កាតេម៉ាឡាដែលត្រូវបាននិរទេសដោយសហរដ្ឋអាមេរិក បានធ្វើដំណើរទៅដល់ទីក្រុង Guatemala កាលពីថ្ងៃព្រហស្បតិ៍ ។

លោក Stuard Rodriguez គឺជាប្រធានវិទ្យាស្ថានអន្តោប្រវេសន៍កាតេម៉ាឡា(IMG) និយាយថា ជើងហោះហើរ ២វ៉ុល គឺជាជើងហោះហើរចុងក្រោយដឹកជនអន្តោប្រវេសន៍ទៅកាន់ប្រទេសកំណើតរបស់ពួកគេវិញ ក្រោមច្បាប់មាត្រា ៤២ ។

លោក Rodriguez បន្តថា ជនអន្តោប្រវេសន៍ជាង ១រយនាក់ ត្រូវបាននិរទេសតាមជើងហោះហើរដំបូង ក្រោមច្បាប់ថ្មី ដែលគេស្គាល់ថាជាមាត្រា៨ ។

ជនអន្តោប្រវេសន៍គ្រប់វ័យទាំងអស់ ឈរតម្រង់ជួរខាងក្រៅការិយាល័យ IMG នៅអាកាសយានដ្ឋានអន្តរជាតិ La Aurora រង់ចាំការចាត់ចែងពីក្រុមអាជ្ញាធរ ។

គួរឲ្យដឹងថា មាត្រា៤២ គឺជាច្បាប់រឹតបន្តឹងជំងឺ COVID-19 របស់សហរដ្ឋអាមេរិក ដែលរារាំងជនអន្តោប្រវេសន៍រាប់ម៉ឺននាក់ដែលជាប់ខ្លួននៅតាមព្រំដែនសហរដ្ឋអាមេរិក-ម៉ិកស៊ិក ដើម្បីស្វែងរកសិទ្ធិជ្រកកោន ចាប់តាំងពីឆ្នាំ ២០២០រហូតមក ។ ច្បាប់មួយនេះ បានបញ្ចប់កាលពីល្ងាចថ្ងៃព្រហស្បតិ៍ ។

ដោយឡែក ក្រោមមាត្រា៨ ជនអន្តោប្រវេសន៍ត្រូវបានគេសន្មតិថាពុំអាចទទួលបានសិទ្ធិជ្រកកោននោះឡើយ បើសិនជាពួកគេឆ្លងកាត់ប្រទេសមួយផ្សេងទៀត តាមផ្លូវទៅកាន់សហរដ្ឋអាមេរិកដោយគ្មានការស្វែងរកការការពារ ឬមួយពួកគេពុំបានប្រើប្រាស់ផ្លូវស្របច្បាប់ទៅកាន់សហរដ្ឋអាមេរិក ។

យោងតាមការអះអាងរបស់ IMGបានឲ្យដឹងថា សហរដ្ឋអាមេរិក បាននិរទេសជនអន្តោប្រវេសន៍កាតេម៉ាឡា ៦១.៤៣៣នាក់ ក្រោមមាត្រា៤២ ចន្លោះខែកញ្ញា ឆ្នាំ ២០២០ និងខែឧសភា ឆ្នាំ ២០២៣ ៕