បាត់ដំបង ៖ ឯកឧត្តមហ៊ុន ម៉ាណែត អនាគតបេក្ខភាពនាយករដ្ឋមន្រ្តីនៃព្រះរាជាណាចក្រកម្ពុជាបានថ្លែងថា ភាពសុខ សាន្ត ភាពសម្បូរសប្បាយរបស់បងប្អូនប្រជាពលរដ្ឋគ្រប់រូប និងការអភិវឌ្ឍលើគ្រប់​វិស័យ​គឺជា​គោលនយោបាយចម្បងបំផុតរបស់រាជរដ្ឋាភិបាលមិនថាបច្ចុប្បន្ន និងអនាគតនោះឡើយ។

ថ្លែងនៅក្នុងឱកាសអញ្ជើញចូលរួមក្នុងពិធីកាត់ឫសសីមា និងសម្ពោធសមិទ្ធផលនានា ក្នុងវត្តសិរីមង្គល ហៅវត្ត​សាមសិប ស្ថិតនៅភូមិសាមសិប ឃុំតាក្រី ស្រុកកំរៀង, ខេត្តបាត់ដំបង នាថ្ងៃទី១២ ខែឧសភា ឆ្នាំ២០២៣នេះ ឯកឧត្តម ហ៊ុន ម៉ាណែត បានលើកឡើងថា «បន្តទៅមុខទៀត រាជរដ្ឋាភិបាលក៏នៅតែ​យកចិត្តទុកដាក់ក្នុង​ការកសាង​អភិវឌ្ឍប្រទេសជាតិ ជាមួយនឹងគោលបំណងអាទិភាពចម្បងឥតកែប្រែគឺការធានានូវជីវភាពសុខសាន្ត និង​សម្បូរសប្បាយរបស់ប្រជាពលរដ្ឋ តាមរយៈការបន្តជំរុញការអភិវឌ្ឍឱ្យកាន់តែប្រសើរដល់មូលដ្ឋាន​របស់ប្រជាពលរដ្ឋ​ជាជំហានៗនៅទូទាំងប្រទេស ក៏ដូចមូលដ្ឋានស្រុកកំរៀងនេះផងដែរ។ ដូច្នេះសូមប្រជាពលរដ្ឋទាំងអស់ចូលរួមជាមួយរាជរដ្ឋាភិបាល និង សម្តេចតេជោ ក្នុងការថែរក្សាឱ្យបាន​នូវបរិស្ថាន​សុខសន្តិភាព ស្ថិរភាពព្រមទាំងឱកាសក្នុងការបន្តកសាងអភិវឌ្ឍប្រទេសឱ្យបានឋិតថេរយូរអង្វែង។

 ឯកឧត្តមបានបន្តថា ក្រោមគោលនយោបាយដ៏ត្រឹមត្រូវរបស់រាជរដ្ឋាភិបាលដឹកនាំដោយ សម្តេចតេជោ នាយករដ្ឋមន្រ្តី, ស្រុកកំរៀងបានប្រែមុខមាត់ពីតំបន់ជម្លោះប្រដាប់អាវុធ អស្ថិរភាព មកជាតំបន់មាន​សុខសន្តិភាពសេរីភាព និងការ​អភិវឌ្ឍរីកចម្រើន ក៏ដូចជាការតភ្ជាប់ហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង ដែលសម្រួលដល់ការធ្វើដំណើរ​ក្នុងជីវភាព​ប្រចំាថ្ងៃ ព្រមទាំងការដឹកជញ្ជូនកសិផលទៅកាន់ទីផ្សារផងដែរ។

ជាមួយគ្នានោះដែរឯកឧត្តម ក៏បានរំលឹកផងដែរថាកាលពី ៤៥ ឆ្នាំមុន សម្តេចតេជោ និងយុទ្ធមិត្តបានចូលរួមបង្កើត​កងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ដើម្បីរំដោះប្រទេស និងប្រជាជន ឱ្យចេញផុតពីរបបប៉ុលពត ដែលបានគ្រប់គ្រងអំណាច ហើយបានកាប់សម្លាប់ប្រជាពលរដ្ឋយ៉ាងព្រៃផ្សៃសាហាវឃោរឃៅ។ មកដល់បច្ចុប្បន្ន កម្លាំងសាមគ្គីភាពនេះ ក៏បានឋិតនៅយ៉ាងរឹងមាំ និងបានបន្តស្មារតី វីរភាព និងសកម្មភាពរួបរួម​គ្នាបំពេញភារកិច្ច​បម្រើជាតិមាតុភូមិ ដោយបានសម្រេចនូវសមិទ្ធផលយ៉ាងច្រើនអនេកជូនសង្គមជាតិ រាប់ទាំងការការពារ​នូវ​អាយុជីវិត​របស់ប្រជាពលរដ្ឋ និងការផ្តល់នូវឱកាស ក្តីសង្ឃឹម និងលំនឹងស្ថិរភាពសម្រាប់អនាគតទៅមុខ៕ ដោយ ៖ បាន ចក់