កាលពីថ្ងៃព្រហស្បតិ៍ទី (១១ ឧសភា) ប្រទេសស្រីលង្កា បានចាប់ផ្តើមគម្រោងមួយក្នុងការផ្គត់ផ្គង់អគ្គិសនីឲ្យរ៉ឺម៉កកង់បីជាងកន្លះលានគ្រឿងរបស់ខ្លួនក្នុងរយៈពេល ៥ ឆ្នាំខាងមុខ ដោយមានជំនួយពីកម្មវិធីអភិវឌ្ឍន៍អង្គការសហប្រជាជាតិ (UNDP) ។

គម្រោងនេះត្រូវបានបង្ហាញនៅទីក្រុង Werahera នៅជាយរដ្ឋធានីក្រុងកូឡុំបូ ដោយរដ្ឋមន្ត្រីក្រសួងដឹកជញ្ជូនលោក Bandula Gunawardane និងមន្ត្រីកម្មវិធីអភិវឌ្ឍន៍អង្គការសហប្រជាជាតិ UNDP ដែលត្រូវបានបង្ហាញពីការកែប្រែរ៉ឺម៉កកង់បីប្រើសាំងទៅជាការប្រើអគ្គិសនីវិញ។

ជាមួយនឹងរ៉ឺម៉កកង់បីជាងមួយលានដែលកំពុងដំណើរការដោយប្រើប្រេងឥន្ធនៈនៅក្នុងប្រទេស ការផ្លាស់ប្តូរឆ្ពោះទៅរកយាន្តយន្តបៃតងនិងស្អាតជាងមុន នឹងកាត់បន្ថយការបំភាយឧស្ម័នកាបូនឌីអុកស៊ីតរបស់ប្រទេសស្រីលង្កា ព្រមទាំងកាត់បន្ថយការពឹងផ្អែកលើការនាំចូលប្រេងឥន្ធនៈ ជាអ្វីដែលប្រទេសនេះ បានតស៊ូអស់ជាច្រើនខែដើម្បីទូទាត់ការចំណាយនៅពេលដែលទុនបម្រុងរបស់ប្រទេសនោះធ្លាក់ចុះដល់កម្រិតទាបបំផុតមិនធ្លាប់មានកាលខែមេសាកាលឆ្នាំមុន។

កម្មវិធីអភិវឌ្ឍន៍អង្គការសហប្រជាជាតិ UNDP នឹងផ្តល់មូលនិធិដល់ការបម្លែងរ៉ឺម៉កម៉ូតូកង់បីដំបូងចំនួន ២០០គ្រឿង ក្រោមគម្រោងនេះ ហើយទីភ្នាក់ងារអង្គការសហប្រជាជាតិ និងរដ្ឋាភិបាលស្រីលង្កា នឹងលុបចោលផែនការសម្រាប់យានយន្តដែលនៅសល់ដោយផ្អែកលើលទ្ធផលចាប់ផ្តើមប្រើប្រាស់។

រ៉ឺម៉កកង់បីអគ្គិសនីមួយអាចធ្វើដំណើរបានពី ៨០ទៅ ១០០គីឡូម៉ែត្រក្នុងការសាកថ្មមួយលើក ប៉ុន្តែដោយមូលដ្ឋានសាកថ្មមានចំនួនតិចតួចនៅឡើយ អ្នកបើករ៉ឺម៉កកង់បីរបស់ប្រទេសស្រីលង្កា នៅមិនទាន់ប្រាកដថាតើគម្រោងនេះ អាចដំណើរការបានតាមជាក់ស្តែងឬយ៉ាងណាទេ៕