ភ្នំពេញ៖ ការបំពេញការងាររបស់អ្នកស័្មគ្រចិត្តតាមផ្នែកនីមួយៗ គឺទទួលបានការកោតសសើរ និងភាពពេញចិត្តពី កីឡាករ គ្រូបង្វឹក ក៏ដូចគណៈប្រតិភូដែលមកចូលរួមក្នុងព្រឹត្តិការណ៍ស៊ីហ្គេម។

កំឡុងពេលនៃព្រឹត្តិការណ៍ស៊ីហ្គេមនេះ ក្រុមអ្នកស្ម័គ្រចិត្ត បានរួមចំណែកដើរតួនាទីយ៉ាងសំខាន់ ក្នុងសម្របសម្រួលលើការងារនានា។

អ្នកស្ម័គ្រចិត្តត្រូវបានបែងចែកការងារ ផ្សេងៗគ្នា ដោយអ្នកស្ម័គ្រចិត្តខ្លះ ត្រូវធ្វើការផ្ទាល់ទាក់ទង ធ្វើដំណើរជាមួយកីឡាករ កីឡាការិនី ទៅមកសណ្ឋាគារក៏ដូចជាទីលានប្រកួត។

មួយរយៈនៃការបំពេញការងារនេះ ក្រុមអ្នកស្ម័គ្រចិត្ត ក៏ទទួលបានការកោតសសើរ ចំពោះការ​បំពេញ​ការងារ ពីកីឡាករ ​និងបណ្ដាគណៈប្រតិភូផងដែរ។

ជាក់ស្ដែងវត្តមាន គ្រូបង្វឹកនៃ កីឡាយូដូ របស់ហ្វីលីពីន ក៏ដូចជាក្រុមមន្រ្តីសិង្ហបុរី លើប្រភេទកីឡា គុណដាវ បានបង្ហាញការពេញចិត្តចំពោះការងាររបស់អ្នកស័្មគ្រចិត្តកម្ពុជា។ ពួកគេលើកឡើងថា ក្រុមការងារអ្នកស័្មគ្រចិត្តកម្ពុជា ពិតជាបំពេញការងារបានល្អ ដោយទទួលខុសត្រូវ ជួយ​​សម្រប​សម្រួល​លើការងារជាច្រើន ​ទាំងការធ្វើដំណើរ​ ការបរិភោគ ក៏ដូចជាការងារ​ជាច្រើន​ទៀត​ដែលពួកគេត្រូវការ។

ចំពោះការពេញចិត្តនេះ ក្រុមកីឡាករ គណៈប្រតិភូមកពីបណ្ដាប្រទេសនានា​ ក៏បានផ្ដល់ជូន Pin ដែលមានរូបទង់ជាតិ ប្រទេសខ្លួន ​ជូនក្រុមអ្នកស្ម័គ្រចិត្តកម្ពុជាវិញដែរ។​ ការផ្ដល់ជូននេះ ដើម្បី​ទុកជាវត្ថុ​អនុស្សាវរីយ៍​ទុកជាការចងចាំ៕ អត្ថបទ៖ គឹមហុក