អ៊ុយក្រែន និយាយថា ខ្លួនបានដណ្តើមយកមកវិញទឹកដីនៅក្នុងទីក្រុងBakhmut ជាការរុលទៅមុខដ៏កម្រ បន្ទាប់រយៈពេលជាច្រើនខែ នៃការជាប់គាំងការដណ្តើមយករបស់រុស្ស៊ីនៅទីក្រុងភាគខាងកើត។

ទីក្រុងគីវ និយាយថា កងកម្លាំងរបស់ខ្លួនបានរុលទៅមុខ ២គីឡូម៉ែត្រ ក្នុងមួយសប្តាហ៍។ រុស្ស៊ីនិយាយថា កងទ័ពរបស់ខ្លួនបានប្រមូលក្រុមឡើងវិញនៅក្នុងតំបន់មួយ។ ការអះអាង បានបង្ហាញសញ្ញាការផ្លាស់ប្តូរកម្លាំងរុញច្រាននៅក្នុងទីក្រុងBakhmut ប៉ុន្តែពុំមានភស្តុតាងច្បាស់លាស់ពីការវាយបករបស់អ៊ុយក្រែននោះទេ។

ទោះជាយ៉ាងណាការផ្ទុះពីរលើកត្រូវបានរាយការណ៍កាលពីថ្ងៃសុក្រនៅក្នុងតំបន់ Luhansk គ្រប់គ្រងដោយរុស្ស៊ី។ រូបភាពជាច្រើន បានបង្ហោះនៅលើបណ្តាញផ្សព្វផ្សាយសង្គម ផ្ទៀងផ្ទាត់​ដោយសារព័ត៌មាន BBC បានបង្ហាញពីផ្សែងខ្មៅ​ខ្មួលខ្មាញ់​ ហុយឡើងពីទីក្រុងនេះ ដែលលាតសន្ធឹង​ប្រមាណ៩០គីឡូម៉ែត្រ នៅពីក្រោយខ្សែត្រៀមជួរមុខ នៅអ៊ុយក្រែនភាគខាងកើត។

មូលហេតុនៅពុំទាន់បានបញ្ជាក់នៅឡើយ ប៉ុន្តែការផ្ទុះបានកើតឡើងមួយថ្ងៃបន្ទាប់ពីចក្រភព​អង់គ្លេស និយាយថា ខ្លួនបាន​ផ្គត់ផ្គង់​ទៅឲ្យអ៊ុយក្រែន នូវមីស៊ីលតម្រង់គោលដៅ Storm Shadow រយៈចម្ងាយឆ្ងាយ។

តំបន់ Luhansk ប្រព័ន្ធកាំភ្លើងធំបាញ់គ្រាប់រ៉ូកែតចល័តទីរហ័សHimars​ មិនអាចបាញ់ដល់ទេ ដែល​អ៊ុយក្រែន ធ្លាប់បានពឹងអាស្រ័យសម្រាប់ការវាយប្រហារចូលជ្រៅលើគោលដៅរបស់រុស្ស៊ី។ ប៉ុន្តែមន្ត្រីដែលតែងតាំងដោយរុស្ស៊ីនៅក្នុងតំបន់ ​បាននិយាយថា ពួកគេគិតថាមីស៊ីលផលិត​នៅ​អ៊ុយក្រែន​ត្រូវបានប្រើប្រាស់សម្រាប់ការវាយប្រហារនេះ ដែលបានធ្លាក់លើអគាររដ្ឋបាល​នៃ​សហគ្រាសដែលលែងដំណើរការចំនួន២កន្លែង។

កាលពីពេលមុន ក្រសួងការពារជាតិរុស្ស៊ី បាននិយាយថា កងទ័ពរុស្ស៊ីនៅក្នុងតំបន់ទីក្រុង Bakhmut បានផ្លាស់ប្តូរទីតាំងរបស់ពួកគេសម្រាប់ហេតុផលយុទ្ធសាស្ត្រ។