ភ្នំពេញ ៖ ឯកឧត្តម កឹមរ័ត្ន វិសិដ្ឋ នាយករងខុន្ទកាល័យសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា រដ្ឋលេខា ធិការទីស្តីការគណៈរដ្ឋមន្រ្តី និងជាប្រធានក្រុមប្រឹក្សាភិបាលវេទិកាសម្ព័ន្ធស៊ីវិល(វ.ស.ស.) នៅល្ងាចថ្ងៃទី ១៣ ខែឧសភា ឆ្នាំ២០២៣នេះ បានជួបពិភាក្សា និងពិគ្រោះយោបល់មួយចំនួនជាមួយ​ប្រធានបណ្តាញ​សង្គមស៊ីវិល​តាមបណ្តា​រាជធានី-ខេត្ត នាទីស្តីការគណរដ្ឋមន្រ្តី។

ថ្លែងនៅក្នុងកិច្ចពិភាក្សានោះ ឯកឧត្តម កឹមរ័ត្ន វិសិដ្ឋ បានលើកឡើងថា រាជរដ្ឋាភិបាលកម្ពុជា ក្រោមការដឹកនាំ​របស់​សម្តេចតជោ ហ៊ុន សែន នាយករដ្ឋមន្រ្តីនៃកម្ពុជាបានធ្វើឲ្យប្រទេសជាតិមានសុខ សន្តិភាព និងការអភិវឌ្ឍ​លើ​គ្រប់វិស័យ ដូច្នេះក្នុងនាមយើងជាបណ្តាញសង្គមស៊ីវិលត្រូវតែខិតខំចូលរួមជា មួយរាជរដ្ឋាភិបាល​ធ្វើយ៉ាងណា​ឲ្យប្រទេសជាតិយើងកាន់តែមានភាពរីកចំរើនខ្លាំងក្លាបន្ថែមទៀត។

ឯកឧត្តមបានបន្តថា នាពេលកន្លងមក ក៏ដូចជាបច្ចុប្បន្នមានជនអគតិមួយចំនួន បានធ្វើការញុះញង និងចិញ្ចឹមចេតនា​ចង់បំផ្លិតបំផ្លាញនូវសុខសន្តិភាព និងការអភិវឌ្ឍដែលកំពុងមានសព្វថ្ងៃនេះ ដូច្នេះ យើងទាំងអស់គ្នាត្រូវតែ​រូបរួមគ្នាទប់ស្កាត់ពួកទាំងនោះឲ្យបាន ហើយក៏ត្រូវបន្តចុះពន្យល់ដល់បងប្អូនប្រជា ពលរដ្ឋឲ្យបាន​សកម្មបន្ថែម​ទៀតកុំឲ្យធ្វើតាមនិងស្តាប់តាមការឃោសនាអកុសលរបស់ពួកទាំងនោះ ដែល នាំឲ្យមានបញ្ហា​ដល់សង្គមជាតិ​ទាំងមូលផងដែរ។

នៅក្នុងពិធីសំណេះសំណាលនោះដែរ ឯកឧត្តម ក៏បានណែនាំបន្ថែមដល់ប្រធានបណ្តាញសង្គម ស៊ីវិលទាំង​អស់ត្រូវខិតខំ​បន្ថែមទៀតក្នុងការប្រមែប្រមូលនូវសមាជិកសមាជិការបស់វ.ស.ស.ឲ្យបានច្រើន បន្ថែមទៀតដើម្បីចូលរួម និងកសាងសង្គមជាតិកម្ពុជាឲ្យកាន់តែរីកចំរើនទៅមុខទៀត និងមួយវិញទៀត គប្បីកុំធ្វើឲ្យបងប្អូន​ប្រជាពលរដ្ឋមាន​ការថ្នាំងថ្នាក់ដោយសារទង្វើអ្វីមិនល្អរបស់យើងផងដែរ៕ ដោយ ៖ បាន ចក់