បទឈប់បាញ់មួយរវាង អ៊ីស្រាអែល និងក្រុមសកម្មប្រយុទ្ធជីហាត បានចូលជាធរមានជាផ្លូវការហើយកាលយប់ថ្ងៃសៅរ៍ ។ កិច្ចព្រមព្រៀងឈប់បាញ់ដែលមានការសម្របសម្រួលរបស់ប្រទេសអេហ្ស៊ីបនេះ មានន័យថា ត្រូវបញ្ឈប់ការបាញ់ផ្លោងឆ្លងកាត់ព្រំដែនដ៏អាក្រក់បំផុត ចាប់តាំងពីសង្រ្គាម១០ថ្ងៃ ក្នុងឆ្នាំ២០២១មក។

ការប្រយុទ្ធគ្នាបានធូរស្រាលបន្តិចម្តងៗ ហើយផ្លូវនានា ក្នុងតំបន់ហ្គាហ្សា ដែលស្ងប់ស្ងាត់នោះ ឥឡូវនេះ សម្បូរទៅដោយជនជាតិប៉ាឡេស្ទីន ។

ប្រជាជនខ្លះ បានសម្ដែងភាពសប្បាយរីករាយ និងបានចុចស៊ីផ្លេរថយន្ដ ខណៈអ្នកផ្សេងទៀតបានធ្វើដំណើរទៅកាន់លំនៅឋានរបស់អ្នកដែលបានបាត់បង់ជីវិតនៅក្នុងការប្រយុទ្ធគ្នាដើម្បីបង្ហាញការគោរពរបស់ខ្លួន។

សេចក្ដីថ្លែងការណ៍មួយចេញពីនាយករដ្ឋមន្រ្ដី បេនចាមីន ណេតាន់យ៉ាហ៊ូ បាននិយាយថា ទីប្រឹក្សាសន្ដិសុខជាតិរបស់ប្រទេសអ៊ីស្រាអែលបានអរគុណប្រធានាធិបតីអេហ្ស៊ីប លោក អាប់ឌែល ហ្វាតា អាល់ ស៊ីស៊ី ចំពោះកិច្ចប្រឹងប្រែងរបស់ក្រុងគែរ នៅក្នុងជម្លោះនេះ។ ក្រុមអ៊ីស្លាមជីហាត ក៏បានបញ្ជាក់ពីកិច្ចព្រមព្រៀងនេះដែរ ។

អ្នកនាំពាក្យក្រុមអ៊ីស្លាមជីហាត លោក តារេក ស៊ីលមី បាននិយាយថា ភាគីក្រុមជីហាត បានបញ្ជាក់ថា លក្ខខណ្ឌនៃកិច្ចព្រមព្រៀងដែលបានចាប់ផ្ដើមនេះ គឺមិនត្រូវទម្លាក់គ្រាប់បែកលើលំនៅឋាននានារបស់ពលរដ្ឋក្នុងតំបន់ហ្គាហ្សាឡើយ។ ហើយបញ្ឈប់គោលនយោបាយសម្លាប់មេដឹកនាំកងពល អាល់គុដ (Al-Quds) និងការបំផ្លាញលំនៅឋានរបស់ជនជាតិប៉ាឡេស្ទីន។

នៅក្នុងអំឡុងពេលយុទ្ធនាការ៥ថ្ងៃកន្លងមកនេះ អ៊ីស្រាអែលបានសម្លាប់មេបញ្ជាការសំខាន់ៗរបស់ក្រុមជីហាត៥នាក់ ហើយបានបំផ្លាញសំណង់យោធាអស់មួយចំនួន។

យ៉ាងហោចណាស់ជនស៊ីវិល១០នាក់ ក្នុងនោះរួមមានស្រ្ដី និងកុមារ បានស្លាប់ផងដែរនៅក្នុងតំបន់ហ្គាហ្សានៅក្នុងអំឡុងពេលប្រយុទ្ធគ្នា ហើយភាគីអ៊ីស្រាអែល មានមនុស្សពីរនាក់ក្នុងនោះមានស្រ្ដីជនជាតិអ៊ីស្រាអែលម្នាក់ និងអ្នកធ្វើការជនជាតិប៉ាឡេស្ទីនម្នាក់បានស្លាប់ដោយការបាញ់គ្រាប់រ៉កែតរបស់ប៉ាឡេស្ទីន ចូលទៅក្នុងប្រទេសអ៊ីស្រាអែល៕