ក្រុមមេដឹកនាំហិរញ្ញវត្ថុនៃប្រទេសមានឧស្សាកម្មទាំង៧ ឬG7 បានព្រមានអំពីវិបត្តិបំណុលសហរដ្ឋអាមេរិក និងការជំរុញការប្រុងប្រយ័ត្នស្របពេលភាពមិនច្បាស់លាស់ផ្នែកសេដ្ឋកិច្ចសកលកាន់តែយ៉ាប់យ៉ឺនខ្លាំងក្នុងជំនួបរយៈពេល៣ថ្ងៃ ដែលបានបញ្ចប់កាលពីថ្ងៃសៅរ៍ ប៉ុន្តែសេចក្ដីថ្លែងការណ៍របស់ខ្លួនពុំបានលើកឡើងពីការប៉ាន់ប្រមាណរបស់ប្រព័ន្ធផ្សព្វផ្សាយពីការដាក់គោលដៅរឹតត្បិតការវិនិយោគក្នុងប្រទេសចិននោះទេ។

ការជួបជុំនៅក្នុងទីក្រុង Niigata របស់ប្រទេសជប៉ុន បានកើតឡើងខណៈក្រុមអ្នករៀបចំគោលនយោបាយសកលកំពុងប្រញាប់ប្រញាល់ទប់ស្កាត់ការខកខានសងបំណុលដ៏ច្រើន ពីសំណាក់ប្រទេសមានសេដ្ឋកិច្ចធំបំផុតរបស់ពិភពលោក ។

ខណៈដែលសេចក្តីថ្លែងការណ៍នេះ ពុំបាននិយាយពីភាពជាប់គាំងនៃប្រាក់បំណុលរបស់សហរដ្ឋអាមេរិក សេចក្ដីថ្លែងការណ៍រួមនេះ បានសង្កត់ធ្ងន់លើការពិភាក្សាជាច្រើន។

ភាពជាប់គាំងបានរង្គោះរង្គើដល់ទីផ្សារ ខណៈការចំណាយលើប្រាក់កម្ចី បានកើនឡើងដ៏គំហុកពីសំណាក់សហរដ្ឋអាមេរិក និងធនាគារកណ្ដាលរបស់សហភាពអឺរ៉ុប។

ក្រុមរដ្ឋមន្ត្រីទាំងនោះ បាននិយាយនៅក្នុងសេចក្ដីថ្លែងការណ៍បន្ទាប់ពីបញ្ចប់កិច្ចប្រជុំថា យើងចាំបាច់ត្រូវបន្តការប្រុងប្រយ័ត្ន និងរក្សាភាពរហ័សរហួន និងមានភាពបត់បែនក្នុងគោលនយោបាយម៉ាក្រូសេដ្ឋកិច្ចរបស់យើងស្របពេលភាពមិនច្បាស់លាស់បានកើនឡើង អំពីចក្ខុវិស័យសេដ្ឋកិច្ចសកល។

រដ្ឋមន្ត្រីរតនាគារសហរដ្ឋអាមេរិក លោកស្រី Janet Yellen ដែលបាននិយាយជាលើកដំបូងថាការខកខានសងបំណុលរបស់សហដ្ឋអាមេរិក អាចកើតមាននៅប៉ុន្មានសប្ដាហ៍ខាងមុខ ប្រសិនបើមិនដោះស្រាយទេនោះ បានប្រាប់សារព័ត៌មាន Reuters កាលពីថ្ងៃសៅរ៍ថា ភាពជាប់គាំងនេះ កាន់តែលំបាកជាងកាលពីកន្លងទៅ ប៉ុន្តែនៅតែសង្ឃឹមថានឹងអាចមានដំណោះស្រាយ៕