ភ្នំពេញ៖ ក្រោយមានបណ្ដាញសង្គមមួយចំនួន បានយករូបចាស់ៗកាលពីឆ្នាំ២០២០ កន្លងទៅ មកបង្ហោះជាសាធារណៈថាទីតាំង ផ្សារស៊ីធីម៉ល មានបង្កប់ល្បែងស៊ីសងខុសច្បាប់ប្រភេទ​ហ្គេមបាញ់ត្រី ​នៅខាងក្នុងដូច្នេះកម្លាំងគណៈបញ្ជាការឯកភាពខណ្ឌ ៧មករា បានចុះដល់ទីតាំង និងត្រួតពិនិត្យជាក់ស្ដែង ​ពុំមានដូចការចុះផ្សាយនោះឡើយ ឃើញតែប្រភេទហ្គេមកូនក្មេងលេង​យករង្វាន់​តុក្កតា និងហ្គេមក្មេងលេងធម្មតាប៉ុណ្ណោះ។

សូមជម្រាបជូនថា ប្រតិបត្តិការចុះត្រួតពិនិត្យ ធ្វើឡើងនៅព្រឹកថ្ងៃទី១៥ ខែឧសភា ឆ្នាំ ២០២៣ មានការបញ្ជាពីលោក ថេង សុថុល អភិបាលនៃគណៈអភិបាលខណ្ឌ ៧មករា បានចាត់ឲ្យ លោក ណុប ផា អភិបាលរង ដឹកនាំកម្លាំង ​គណៈបញ្ជាការឯកភាពខណ្ឌចុះត្រួតពិនិត្យផ្ទាល់តែម្ដង នៅចំណុចទីតាំង ផ្សារទំនើបស៊ីធីម៉ល ស្ថិតនៅតាមបណ្ដោយផ្លូវលេខ២១៧ ភូមិ០៧ សង្កាត់វាលវង់ ខណ្ឌ៧មករា រាជធានីភ្នំពេញ តែពុំមានអ្វីពាក់ព័ន្ធបទល្មើសនិងល្បែងស៊ីសងឡើយ។

នៅក្នុងការចុះត្រួតពិនិត្យនេះផងដែរអាជ្ញាធរ ​បានអប់រំណែនាំដល់ម្ចាស់គ្រប់គ្រងទីតាំង និងបាន​ធ្វើការកិច្ចសន្យា ចំពោះមុខជាមួយសមត្ថកិច្ច ហាមមិនឱ្យមានបង្កប់ល្បែងស៊ីសង​គ្រប់ប្រភេទ​និងបទល្មើសផ្សេងៗដែលខុសច្បាប់ ​ការជួញដូរមនុស្ស ​និងសារធាតុញៀនជាដើម។ ក្នុងករណីមិនអនុវត្តតាមកិច្ចសន្យាអាជ្ញាធរ និងអនុវត្តតាមតិវិធីច្បាប់៕ អត្ថបទ៖ កុម្ភៈ