រលកកម្តៅ បានបន្ថែមទុក្ខទោសដល់ស្រ្តីរស់នៅតំបន់ដាច់ស្រយាលនៅរដ្ឋភាគខាងលិច Maharashtraប្រទេសឥណ្ឌា ដែលរាល់ថ្ងៃពួកគេជួបការលំបាកណាស់ទៅហើយក្នុងការស្វែងរកទឹកស្អាត ។ 

 អ្នកស្រុកដែលជាស្រ្តីរស់នៅក្នុងភូមិ Aamdongraស្ថិតក្នុងស្រុកភាគខាងលិច Nashikបានដើរចម្ងាយរាប់សិបគ.ម និងប្រថុយជីវិតរបស់ពួកគេ ដើម្បីចុះក្នុងអណ្តូងជ្រៅៗ ដងទឹកប៉ុន្មានលីត្រដាក់ចូលក្អមទឹករបស់ពួកគេ។ 

 អ្នកស្រី Laxmi Jairam Gaikwad គឺជាអ្នកស្រុកមួយរូបនិយាយថា រាល់ថ្ងៃស្រ្តី ២នាក់ ចុះក្នុងអណ្តូង ហើយបន្ទាប់មកពួកយើងដងទឹកដាក់ក្អមរបស់ពួកយើង ។ 

 សីតុណ្ហភាពក្តៅខ្លាំង បានបន្ថែមការលំបាកដល់ស្រ្តីទាំងអស់នេះ ពេលដែលវាធ្វើឲ្យធម្មជាតិក្តៅស្ងួតហួតហែង និងធ្វើឲ្យរីងប្រភពទឹកនៅតំបន់ជួបគ្រោះរាំងស្ងួត ។ 

 អ្នកភូមិតែងតែប្រមូលលុយគ្នាហៅឡានទឹកដែលភូមិទាំងមូលប្រើប្រាស់តែឡានទឹកមួយគ្រឿងប៉ុណ្ណោះ សម្រាប់ការងារផ្ទះប្រចាំថ្ងៃរបស់ពួកគេ ។ វិបត្តិទឹកមិនមែនជាអព្ភូតហេតុថ្មីនោះទេនៅក្នុងប្រទេសឥណ្ឌា ។ តំបន់ជាច្រើននៅក្នុងប្រទេសឥណ្ឌា តែងតែជួបកង្វះខាតទឹក ជាពិសេសអំឡុងខែឧសភា និងខែមីថុនា ដែលជាខែក្តៅបំផុតនៅក្នុងប្រទេសមួយនេះ ៕