​កាលពី​ថ្ងៃ​សៅរ៍​ចុង​សប្តាហ៍​កន្លងទៅ បុរស​ម្នាក់​រស់នៅក្នុង​រដ្ឋ Florida សហរដ្ឋអាមេរិក បាន​បង្កើត​កំណត់ត្រា​រស់នៅ​ក្រោម​ទឹក​យូរ​ជាងគេ​បំផុត​នៅលើ​ពិភពលោក ពេលដែល​លោក​ចំណាយពេល​៧៤​ថ្ងៃ រស់នៅក្នុង​សណ្ឋាគារ​ក្រោម​ទឹក Jules Undersea Lodge ស្ថិតក្នុង​ទីក្រុង Key Largo។

​លោក​វេជ្ជបណ្ឌិត Joseph Dituri ដែលជា​អ្នកស្រាវជ្រាវ​មុជ​ក្រោម​ទឹក និង​អ្នកស្រាវជ្រាវ​វេជ្ជសាស្ត្រ បាន​ចូលរួម​គម្រោង​ពិសោធន៍ 'Project Neptune 100' ឧបត្ថម្ភ​ដោយ​គ្រឹះស្ថាន​អភិវឌ្ឍន៍​ធនធាន​សមុទ្រ។

លោក Dituri និយាយថា កំណត់ត្រា​នេះ គឺជា​រឿង​តូចតាច​ប៉ុណ្ណោះ ពួកយើង​ស្រលាញ់​វា ហើយ​ខ្ញុំ​ពិតជា​កោតសរសើរ​វា​ខ្លាំងណាស់ ខ្ញុំ​ក៏មាន​កិត្តិយស​ណាស់ដែរ ដែល​ទទួលបាន​វា ប៉ុន្តែ​ពួកយើង​នៅមាន​វិទ្យាសាស្ត្រ​ជាច្រើន​ទៀត ត្រូវធ្វើ វិទ្យាសាស្ត្រ​មិន​បញ្ឈប់​ត្រឹមហ្នឹង​នោះទេ។

លោក Dituri បន្តទៀតថា លោក​មាន​គម្រោង​នៅក្រោម​ទឹក​រហូតដល់​ថ្ងៃទី៩ ខែមិថុនា ជា​ពេលដែល​លោក​អាច​រស់នៅ​ក្រោម​ទឹក​រយៈពេល​រហូតដល់ ១០០​ថ្ងៃ។

​គួរ​ឲ្យ​ដឹងថា កំណត់ត្រា​លើក​មុន សម្រាប់​ការរស់នៅ​ក្រោម​ទឹក​យូរ​ជាងគេ​បំផុត មាន​រយៈពេល​៧៣​ថ្ងៃ ដែល​ត្រូវ បាន​បង្កើតឡើង​កាលពី​ឆ្នាំ២០១៤៕​