យោងតាម​មន្ត្រីជាន់ខ្ពស់​របស់​ទីភ្នាក់ងារ​ស៊ើបអង្កេត​ចារកម្ម​សម្ងាត់ CIA និង​មន្ត្រី​ម្នាក់​មកពី​ការិយាល័យ​ឃ្លាំមើល​បានឱ្យដឹងថា អគ្គ​អធិការ CIA បាន​បើក​ការស៊ើបអង្កេត​ឯករាជ្យ​លើ​ការចោទប្រកាន់​របស់​ទីភ្នាក់ងារ​នេះ​អំពី​ការគ្រប់គ្រង​មិនបាន​ល្អ​លើ​ករណី​រំលោភបំពាន​ផ្លូវភេទ និង​ការ​បៀតបៀន​ដែល​ពាក់ព័ន្ធ​នឹង​ក្រុមមន្ត្រី​របស់ខ្លួន ។​

​ការសម្រេច​របស់​អង្គភាព​ឃ្លាំមើល​ដើម្បី​ផ្តួចផ្តើម "​ការពិនិត្យ​ពិសេស​ឡើងវិញ​" មាន​ឡើង នៅពេលដែល​ទីភ្នាក់ងារ CIA ស្ថិតនៅក្រោម​ការត្រួតពិនិត្យ​កាន់តែខ្លាំង​ឡើងលើ​ការដោះស្រាយ​ការរំលោភ​ផ្លូវភេទ និង​ការចោទប្រកាន់​លើ​បៀតបៀន​ផ្លូវភេទ ព្រមទាំង​ជាការ​ចាប់ផ្តើម​នៃ​ការស៊ើបអង្កេត​ជា​ផ្លូវការ​លើ​ការអះអាង​ដែលថា​ទីភ្នាក់ងារ​នេះ "​បាន​ប្រព្រឹត្ត​ខុស​យ៉ាងធ្ងន់ធ្ងរ​" ក្នុងករណី​មួយចំនួន​។​

​ខណៈដែល​ទីភ្នាក់ងារ IG បានចាប់ផ្តើម​សម្ភាស​បណ្ដា​បុគ្គលិក CIA រួចហើយ ដែលជា​ផ្នែក​មួយ​នៃ​ការស៊ើបអង្កេត​របស់ខ្លួន ទីភ្នាក់ងារ​នេះ​ក៏​កំពុង​ចាត់វិធានការ​ថ្មី​ដើម្បី​ផ្លាស់ប្តូរ​វិធីសាស្ត្រ​ដែល​ខ្លួន​ប្រើ​ដើម្បី​ដោះស្រាយ​លើ​ករណី​រំលោភ​ផ្លូវភេទ និង​ការចោទប្រកាន់​លើ​ការ​បៀតបៀន​ផ្លូវភេទ នេះ​បើ​យោងតាម​សេចក្តីថ្លែងការណ៍​ពី​នាយក CIA លោក William Burns កាលពី​ថ្ងៃ​ព្រហស្បតិ៍​។​

​នោះ​រួមបញ្ចូល​ទាំង​ការជ្រើសរើស​អ្នកដឹកនាំ​ថ្មី​សម្រាប់​ការិយាល័យ​ឆ្លើយតប​ទប់ស្កាត់​រំលោភ​ផ្លូវភេទ និង​ការការពារ​របស់ខ្លួន គឺ​លោក​បណ្ឌិត Taleeta Jackson នឹង​បំពេញ​នូវ​អ្វីដែល​ទីភ្នាក់ងារ CIA ហៅថា "​តួនាទី​សំខាន់​ក្នុងការ​កែលម្អ​វិធី​ដែល​ទីភ្នាក់ងារ​ដំណើរការ និង​ឆ្លើយតប​ទៅនឹង​ការចោទប្រកាន់​ពីបទ​រំលោភ​ផ្លូវភេទ​"​។​

​មន្ត្រីជាន់ខ្ពស់​របស់​CIA បាន​និយាយថា បណ្ដា​មេដឹកនាំ CIA បាន​និយាយ​ជាមួយ​បុគ្គលិក​មួយចំនួន​ក្នុង​ប៉ុន្មាន​ខែ​ថ្មីៗ​នេះ ហើយ​តាមរយៈ​ការសន្ទនា​ទាំងនោះ វា​ច្បាស់​ណាស់​ថា​ទីភ្នាក់ងារ​ត្រូវការ​ផ្លាស់ប្តូរ​ដំណើរការ​នានា​របស់ខ្លួន៕