​សមាជិកគ្រួសារ​បាន​ប្រមូល​ផ្តុំគ្នា​កាលពី​ថ្ងៃអាទិត្យ​ដើម្បី​រំលឹក​ខួប​មួយឆ្នាំ​ចាប់តាំងពី​ករណី​ការបាញ់ប្រហារ​ដោយ​ការរើសអើង​ពូជសាសន៍​នៅ​ផ្សារ​ទំនើប Buffalo ដែល​បាន​បណ្តាលឱ្យ​មនុស្ស ១០ នាក់​បាន​ស្លាប់​។ កាលពី​ថ្ងៃទី​១៤ ខែឧសភា ឆ្នាំ២០២២ លោក Payton Gendron អាយុ ១៨ ឆ្នាំ​បាន​បាញ់សម្លាប់​អ្នកទិញ​ទំនិញ​ជនជាតិ​ស្បែក​ខ្មៅ ១០ នាក់​នៅ​ហាង Tops Friendly Markets ក្នុង​តំបន់ Buffalo ទីក្រុង​ញូវយ៉ក​។​

​លោក Gendron ដែលជា​ជនជាតិ​ស្បែ​កស ត្រូវបាន​កាត់ទោស​ឱ្យ​ជាប់គុក​អស់​មួយជីវិត​ដោយ​គ្មាន​លទ្ធភាព​នៃ​ការបន្ធូរបន្ថយ​ទោស​កា​លពី​ខែកុម្ភៈ​ឆ្នាំ២០២៣​។ អភិបាលក្រុង​ញូវយ៉ក លោកស្រី Kathy Hochul បាន​សរសើរ​ភាព​អត់ធន់​របស់​អ្នកស្រុក​ក្នុង​តំបន់​ចំពោះ​អ្វីដែល​ការិយាល័យ​របស់លោក​ស្រី​ឲ្យ​ឈ្មោះថា "​ការវាយប្រហារ​ភេរវកម្ម​របស់​ក្រុម​ស្បែក​ស​ជ្រុលនិយម​"​។​

​សមាជិក​ព្រឹទ្ធសភា​ក្រុង​ញូវយ៉ក​លោក Chuck Schumer បាន​សួរសុខទុក្ខ​ដល់​ក្រុមគ្រួសារ​ជនរងគ្រោះ ដោយ​និយាយថា កិច្ចខិតខំ​ប្រឹងប្រែង​តស៊ូ​មតិ​របស់​ពួកគេ​បាន​ជួយ​ឲ្យ​សភា និង​ព្រឹទ្ធសភា​អាមេរិក​អនុម័ត​ច្បាប់​គ្រប់គ្រង​ការប្រើប្រាស់​អាវុធ​។ ប្រធានាធិបតី​អាមេរិក​លោក Joe Biden បាន​បង្ហោះ​សារ​គាំទ្រ និង​ការចងចាំ ខណៈ​អំពាវនាវ​ឲ្យ​មានការ​ហាមប្រាម​លើ​អាវុធ​វាយប្រហារ​។​

​ក្រុម​អាជ្ញាធរ​បាន​និយាយថា លោក Gendron បាន​ផ្សាយ​ផ្ទាល់​វីដេអូ​នៃ​ការវាយប្រហារ​នោះ នៅលើ​ប្រព័ន្ធ​ផ្សព្វផ្សាយ​សង្គម​។ ខ្មាន់កាំភ្លើង​រូបនេះ បាន​បង្ហោះ​ពី​ទង្វើ​ការរើសអើង​ជាតិ​សាសន៍​តាម​អន​ឡាញ ដែល​រៀបរាប់​លម្អិត​ពី​ការ​ហេតុផល​របស់ខ្លួន​ក្នុងការ​សម្លាប់​រង្គាល​ក្នុង​ហេតុផល​រើសអើង​ជាតិ​សាសន៍ ដោយមាន​ចេតនា​បង្ហាញ​ពី​ទ្រឹស្តី​បំផុស​ចេតនា​អា​ក្រាក់​ក្នុងចំណោម​ក្រុម​អ្នក​ជាតិនិយម​ស្បែក​ស​ដែលថា ប្រជាជន​ស្បែ​កស កំពុង​ត្រូវ​ចូលមក​ជំនួស​ដោយ​ជនអន្តោប្រវេសន៍​មិនមែន​ស្បែ​កស នៅក្នុង​សហរដ្ឋអាមេរិក​។​

​សកម្មភាព​ដ៏​កំរោល​នេះ គឺជា​ការបាញ់ប្រហារ​ដ៏​សាហាវ​បំផុត​ក្នុងចំណោម​ការបាញ់ប្រហា​រ​សម្លាប់​រង្គាល​ជា​បន្តបន្ទាប់ ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ក្នុងប្រទេស​ដែល​កាន់តែ​ស៊ាំ​នឹង​ការកើនឡើង​នៃ​ឧក្រិដ្ឋកម្ម​របៀបនេះ​៕​