អតីតនាយករដ្ឋមន្ត្រីប៉ាគីស្ថាន លោក Imran Khan នឹងត្រូវចូលខ្លួនមកកាន់តុលាការវិញ នៅថ្ងៃចន្ទ (ទី១៥ ខែឧសភា) បន្ទាប់ពីការចាប់ខ្លួន និងឃុំខ្លួនរយៈពេលខ្លី កាលពីសប្តាហ៍មុន បានបង្កឲ្យមានភាពចលាចលស៊ីវិលដ៏គ្រោះថ្នាក់អស់រយៈពេលជាច្រើនថ្ងៃ។
លោក Khan ត្រូវបានចាប់ខ្លួនពីបទពុករលួយ កាលពីថ្ងៃអង្គារ ដោយជំរុញឲ្យអ្នកគាំទ្រផ្ទុះកំហឹងពេញទីក្រុងនានាទូទាំងប្រទេសប៉ាគីស្ថាន មុនពេលតុលាការកំពូល បានប្រកាសថាការឃុំខ្លួនរូបលោក គឺជារឿងខុសច្បាប់ នៅបីថ្ងៃក្រោយមក។
មេធាវីម្នាក់ ក្នុងចំណោមមេធាវីរបស់អតីតនាយករដ្ឋមន្ត្រីរូបនេះ បាននិយាយថា អតីតកីឡាករគ្រិកឃីតអន្តរជាតិ នឹងត្រូវវិលត្រឡប់ទៅកាន់តុលាការកំពូលក្រុង Lahore ដែលជាក្រុងកំណើតរបស់លោកវិញ ដើម្បីប្រឈមមុខនឹងបទចោទប្រកាន់ថ្មី ដោយរូបលោកត្រូវបានចោទថា បានរៀបចំផែនការបង្កអំពើហិង្សា ក្រោយមានការចាប់ខ្លួន។
លោកមេធាវី Intazar Hussain Panjutha បានប្រាប់ AFP ថា៖ «លោក Khan នឹងបង្ហាញខ្លួននៅតុលាការ នាថ្ងៃនេះ សម្រាប់សំណុំរឿង ដែលត្រូវបានចុះបញ្ជីប្រឆាំងនឹងរូបលោកទាក់ទងនឹងហេតុការណ៍ ចាប់ពីថ្ងៃទី៩ ដល់ថ្ងៃទី១២ ខែឧសភា»។
អាជ្ញាធរបានឲ្យដឹងថា យ៉ាងហោចណាស់មនុស្ស ៩នាក់ បានស្លាប់ មន្ត្រីនគរបាលរាប់រយនាក់ បានរងរបួស និងមនុស្សជាង ៧.០០០នាក់ ត្រូវបានឃុំខ្លួននៅក្នុងភាពចលាចលកាលពីសប្តាហ៍មុន មុនពេលលោក Khan ត្រូវបានដោះលែងឲ្យនៅក្រៅឃុំ កាលពីថ្ងៃសុក្រ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
