​

​ព្យុះ​ស៊ីក្លូន Mocha បាន​បោកបក់​កាត់​សហភាព​មី​យ៉ាន់​ម៉ា និង​ភាគ​អាគ្នេយ៍​នៃ​ប្រទេស​បង់​ក្លា​ដែ​ស កាលពី​ថ្ងៃអាទិត្យ ដោយបាន​បំផ្លិចបំផ្លាញ​ជំរុំ​ជនភៀសខ្លួន នៅក្នុង​ទីក្រុង Cox's Bazar និង​នាំមក​នូវ​ការកើនឡើង​នៃ​ខ្យល់ព្យុះ ដែល​បោកបក់​មួយ​វឹប​ចំពោះ​តំបន់​ភាគ​ខាងលិច​របស់​មី​យ៉ាន់​ម៉ា ដែលជា​កន្លែង​ទំនាក់ទំនង​ភាគច្រើន​ត្រូវបាន​កាត់ផ្តាច់​។​

​យោងតាម​ព័ត៌មាន​បឋម បាន​ឲ្យ​ដឹងថា យ៉ាងហោចណាស់​មនុស្ស ៦​នាក់ ត្រូវបាន​រាយការណ៍​ថា បាន​ស្លាប់ នៅ​ទូទាំងប្រទេស​មី​យ៉ាន់​ម៉ា​។

​ព្យុះ​ស៊ីក្លូន​នេះ បាន​បោកបក់​លើដី​នៅ​ចន្លោះ​ទីក្រុង Cox's Bazar និង​ទីក្រុង Sittwe ប្រទេស​មី​យ៉ាន់​ម៉ា ដោយមាន​កម្លាំង​ខ្យល់​បក់​ដល់​ទៅ ១៩៥​គីឡូម៉ែត្រ​ក្នុង​មួយ​ម៉ោង ជា​ព្យុះ​ដ៏​ធំ​បំផុត ដែល​បាន​វាយប្រហារ​ឈូង​សមុទ្រ Bengal ក្នុង​រយៈពេល​ជាង​មួយ​ទសវត្សរ៍​នេះ​។​

​គិត​ត្រឹម​ល្ងាច​ថ្ងៃអាទិត្យ ខ្យល់ព្យុះ​បាន​កន្លងផុតទៅ​ភាគច្រើន ហើយ​ការិយាល័យ​អាកាសធាតុ​បាន​និយាយថា វា​នឹង​ថមថយ​កម្លាំង នៅពេលដែល​វា​បុក​នឹង​ភ្នំ​នៃ​ផ្នែក​ខាងក្នុង​ទឹកដី​របស់​មី​យ៉ាន់​ម៉ា​។​

​ស្នងការ​ផ្តល់ជំនួយ​ស​ង្គ្រោះ និង​ធ្វើ​មាតុភូមិនិវត្តន៍ (RRRC) លោក Mohammed Mizanur Rahman បាន​និយាយថា ជម្រក​បណ្តោះអាសន្ន​ប្រមាណ ៤០០-៥០០ ត្រូវបាន​ខូចខាត​នៅក្នុង​ជំរុំ​ស្នាក់នៅ​របស់​ជនភៀសខ្លួន​រ៉ូ​ហ៊ីង​យ៉ា​ជាង ១,២​លាន​នាក់ នៅក្នុង​ទីក្រុង Cox's Bazar របស់​ប្រទេស​បង់​ក្លា​ដែ​ស ប៉ុន្តែ​មិនមាន​របាយការណ៍​ភ្លាមៗ​អំពី​ជនរងគ្រោះ​នោះទេ​៕

​