​យោងតាម​ព័ត៌មាន​ថ្មី​ចុងក្រោយ ដែល​កំពុង​កើតឡើង បាន​ឲ្យ​ដឹងថា កុមារ​ត្រូវ​បានកំណត់​គោលដៅ​ថា ជា​អ្នក​ដំបូង​ដែល​តម្រូវ​ឲ្យ​បង្អត់អាហារ​ឯង​រហូត​ដល់​ស្លាប់ នៅក្នុង​ថ្ងៃ​ចុងក្រោយ​នៃ​ជំនឿ​ពិភព​លោកវិនាស​តាមបែប​សាសនា​គ្រិស្ត នៅ​ប្រទេស​កេ​ន​យ៉ា​។​

​មកទល់ពេលនេះ នគរបាល​ដែល​ស៊ើបអង្កេត​លើ​ករណី​ធ្វើអត្តឃាត​ដ៏​ធំ​មួយ បាន​រកឃើញ​សាកសព​ចំនួន ២០១​នាក់ នៅក្នុង​ព្រៃ​មួយ នៅ​ភាគ​អាគ្នេយ៍​របស់​ប្រទេស​នេះ​។​

​អតីត​គ្រូ​ផ្តល់​ឱវាទ​នៃ​ពិធី​សាសនា​នេះ លោក Titus Katana បាន​ប្រាប់​កាសែត New York Times ថា កុមារ​ត្រូវបាន​សម្លាប់​ជាមុន ដោយបាន​បញ្ជា​ឲ្យ «​អត់​អាហារ​រ​នៅក្រោម​កម្ដៅ​ព្រះអាទិត្យ ដើម្បី​ឲ្យ​ពួក​ឆាប់​ស្លាប់​»​។ បន្ទាប់មក ស្ត្រី និង​បុរស នឹង​ក្លាយជា​អ្នក​បន្ត ក្នុង​វិធី​ធ្វើអត្តឃាត​នេះ​។

​លោក Katana ដែល​កំពុង​ជួយ​នគរបាល​ក្នុងការ​ស៊ើបអង្កេត​នោះ ក៏បាន​រៀបរាប់​ប្រាប់​កាសែត Sunday Times ផងដែរ​ពី​ការប្រព្រឹត្ត​ដ៏​ឃោរឃៅ​លើ​កុមារ​ទាំងនេះ ដោយ​និយាយថា ពួកគេ​ត្រូវបាន​បង្ខាំង​ទុក​ក្នុង​ខ្ទម​អស់​រយៈពេល ៥​ថ្ងៃ ដោយ​មិន​ទទួលបាន​អាហារ ឬ​ទឹក​សូម្បី​បន្តិច​។​

​មានការ​លើកឡើងថា អ្នក​បដិបត្តិ​តាម​សាសនា​នេះ ត្រូវបាន​គេ​ប្រាប់ថា ពួកគេ​នឹង​បាន​ឡើងឋានសួគ៌​កាន់តែ​ឆាប់ ប្រសិនបើ​ពួកគេ​អត់​អាហារ​រហូតដល់​ស្លាប់​។ ការធ្វើ​កោសល្យ​វិ​ច្ច័​យ​ជា​ផ្លូវការ​លើ​សាកសព​មួយចំនួន​នៅក្នុង​កសិដ្ឋាន Shakahola ដ៏​ធំ​ទូលាយ នៅ​ជិត​ទីក្រុង​ឆ្នេរសមុទ្រ Malindi បាន​រកឃើញ​ពី​ភិនភាគ​នៃ​ស្លាប់​ដោយ​អត់​អាហារ ការ​ថប់ដង្ហើម និង​ការវាយដំ​។​

​មនុស្ស​ជាង ៦០០​នាក់ ដែល​ត្រូវបាន​គេ​រាយការណ៍​ថា ជា​សមាជិក​នៃ​ក្រុម​ជំនឿ​ពិភពលោក​វិនាស ដែល​ត្រូវបាន​ចោទប្រកាន់ថា ដឹកនាំ​ដោយ​គ្រូ​គង្វាល លោក Paul Mackenzie នៅ​បាត់​ខ្លួន​នៅឡើយ​៕​