ភ្នំពេញ៖ សាធារណរដ្ឋឆែក បានប្តេជ្ញាពង្រីកកិច្ចសហប្រតិបត្តិការបន្ថែមទៀតជាមួយកម្ពុជា លើការកសាងធនធានមនុស្សឲ្យកាន់តែមានសមត្ថភាពខ្ពស់ និងមានជំនាញវិជ្ជាជីវៈ ដែលអាចឆ្លើយតបទៅនឹងតម្រូវការទីផ្សារការងារក្នុងបរិបទនៃការរីកចម្រើនសេដ្ឋកិច្ច និងបច្ចេកវិទ្យា។

នៅក្នុងជំនួបការងារ រវាងឯកឧត្តម Petr Gandalovic ប្រធាននាយកដ្ឋានកិច្ចសហប្រតិបត្តិការផ្នែក​អភិវឌ្ឍន៍ និងជំនួយមនុស្សធម៌ តំណាងក្រសួងការបរទេសនៃសាធារណរដ្ឋឆែក ​និងឯកឧត្តម Martin Vávra ឯកអគ្គរដ្ឋទូតឆែកប្រចាំនៅកម្ពុជា កាលពីព្រឹកថ្ងៃទី១៥ ឧសភា ឆ្នាំ២០២៣នេះ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ ​និងបណ្តុះបណ្តាលវិជ្ជាជីវៈ បានថ្លែង​អំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់​សាធារណរដ្ឋឆែកក្នុងការពង្រឹង និងផ្តល់កិច្ច​សហប្រតិបត្តិការយ៉ាងល្អកន្លងមកលើវិស័យការងារ ជាពិសេសវិស័យបណ្តុះបណ្តាល​បច្ចេកទេស និងវិជ្ជាជីវៈ និងទីភ្នាក់ងារជាតិមុខរបរ និងការងារ។

ឯកឧត្តមរដ្ឋមន្ត្រី បានបញ្ជាក់ថា​ ក្នុងរយៈពេលនៃកិច្ចសហប្រតិបត្តិការ៥ឆ្នាំកន្លងមកនេះ រដ្ឋាភិបាល​កម្ពុជា ក៏មានកិច្ចសហប្រតិបត្តិការជាមួយអង្គការភីន ដែលជាអង្គការមិនមែនរដ្ឋាភិបាល និង​មិនរកប្រាក់ចំណេញនៃប្រទេសឆែក ​ដែលអនុវត្តលើគម្រោងជំនួយមនុស្សធម៌ គម្រោង​អភិវឌ្ឍន៍​រយៈពេលវែង កម្មវិធីអប់រំ និងបានចូលមកកម្ពុជាពីឆ្នាំ២០០៨។

ឯកឧត្តម បន្តទៀតថា រាជរដ្ឋាភិបាលកម្ពុជា​ក៏បានដាក់ចេញនូវគោលនយោបាយអភិវឌ្ឍន៍​ជំនាញ​ដល់យុវជនគ្រួសារក្រីក្រប្រមាណ១លាន៥សែននាក់ (ស្មើនឹង១៥%នៃកម្លាំងពលកម្មសរុប) តាម​រយៈការផ្តល់វគ្គបណ្តុះបណ្តាលពិសេស​ ដែលកម្មវិធីនេះគឺជាចំណុចអាទិភាពខ្ពស់មួយដែលក្រសួង​ការងារកំពុងផ្តោតសំខាន់។

ជាការឆ្លើយតប ឯកឧត្តម Petr Gandalovic បានវាយតម្លៃខ្ពស់ទៅលើការដាក់ចេញនូវគោល​នយោបាយ​រាជរដ្ឋាភិបាលកម្ពុជាក្នុងការអភិវឌ្ឍជំនាញរបស់យុវជនក្រីក្រនេះ ​និងបាន​ស្វាគមន៍​ក្នុងការផ្តល់កិច្ចសហប្រតិបត្តិការទៅលើគម្រោងនេះផងដែរ។

ឯកឧត្តមបន្តថា កន្លងមក ​សាធារណរដ្ឋឆែកតែងតែបានផ្តល់ការគាំទ្រទៅលើការអភិវឌ្ឍវិស័យ​បណ្តុះបណ្តាល​បច្ចេកទេស និងវិជ្ជាជីវៈ (TVET) នៅក្នុងប្រទេសកម្ពុជា ប៉ុន្តែដើម្បីឱ្យកិច្ច​សហប្រតិបត្តិការ​កាន់​តែមានប្រសិទ្ធិភាពទៀតនោះ​ ភាគីទាំងពីរគួរពិភាក្សាទៅលើការរៀបចំ​កម្មវិធី​សិក្សារបស់ TVET ផងដែរ ពិសេសទៅលើមុខវិជ្ជាជំនាញដែលនឹងមានសក្តានុពលទៅថ្ងៃអនាគត ដើម្បីឆ្លើយតបទៅនឹងតម្រូវការទីផ្សារការងារ​ ដូចជាផ្នែកការកែច្នៃផលិតផលកសិកម្មជាដើម។

ភាគីទាំងពីរបានសម្ដែងនូវការពេញចិត្តចំពោះកិច្ចសហប្រតិបត្តិការកន្លងមក ហើយបានប្តេជ្ញាក្នុង​ពង្រីកកិច្ចសហប្រតិបត្តិការបន្ថែមទៀតទៅលើការកសាងធនធានមនុស្សឲ្យកាន់តែមានសមត្ថភាពខ្ពស់ មានជំនាញវិជ្ជាជីវៈ ដែលអាចឆ្លើយតបទៅនឹងតម្រូវការទីផ្សារការងារក្នុងបរិបទ​នៃការរីក​ចម្រើន​សេដ្ឋកិច្ច និងបច្ចេកវិទ្យា៕អត្ថបទ៖ ឈិត បូរ៉ាវី