ទូរទស្សន៍រដ្ឋមីយ៉ាន់ម៉ា MRTV បានបង្ហាញរូបភាពដែលយោធាត្រៀមការផ្គត់ផ្គង់ជំនួយ​សង្រ្គោះ​បន្ទាន់​សម្រាប់តំបន់រងផលប៉ះពាល់ដោយសារព្យុះស៊ីក្លូន Mocha នៅក្នុងប្រទេសមួយនេះ ។

យោងតាមសេចក្តីរាយការណ៍ បានឲ្យដឹងថា ការផ្គត់ផ្គង់ជំនួយសង្រ្គោះបន្ទាន់ នឹងត្រូវចែកចាយ​តាមមធ្យោបាយដឹកជញ្ជូនជាច្រើនទៅកាន់តំបន់រងផលប៉ះពាល់ តាមការបញ្ជារបស់មេដឹកនាំ​របបយោធាមីយ៉ាន់ម៉ាលោក Min Aung Hlaing ព្យុះស៊ីក្លូន Mochaដែលបានបោកបក់​ឆ្លងកាត់​តំបន់​ឆកសមុទ្រ​បឹងហ្គាល់ បានបណ្តាលឲ្យមនុស្ស ២៩នាក់ បាត់បង់ជីវិតនៅមីយ៉ាន់ម៉ា និងមនុស្ស​រាប់សិបនាក់ផ្សេងទៀតរងរបួស ។

ប្រជាពលរដ្ឋក្នុងតំបន់និយាយថា ទោះបីជាយ៉ាងណាក៏ដោយ ជំរំជនភៀសខ្លួននៅតំបន់ភាគ​អាគ្នេយ៍​ប្រទេសបង់ក្លាដែស ​សម្រាប់ជនមូស្លីមរ៉ូហ៊ីងយ៉ាមកពីសហភាពមីយ៉ាន់ម៉ា បានគេចផុត​ពីព្យុះដ៏អាក្រក់មួយនេះ ​បើទោះបីជាខ្ទមធ្វើពីដើមឫស្សីជាច្រើនខ្នង រងការខូចខាតក៏ដោយ ។

រដ្ឋ Rakhine ដែលហែកហួរដោយសារជម្លោះជាមួយយោធាមីយ៉ាន់ម៉ា រងគ្រោះធ្ងន់ធ្ងរខ្លាំង​ដោយ​សារព្យុះ Mocha ជាទីដែលខ្យល់បក់ក្នុងល្បឿន ២១០គ.ម ក្នុង១ម៉ោង ធ្វើឲ្យប៉ើងដំបូលផ្ទះ ហើយភ្លៀងបង្កឡើងដោយសារព្យុះ ​បានជន់លិចទីក្រុងSittwe កាលពីថ្ងៃអាទិត្យ ។

ទូរទស្សន៍ Myawaddy TV គ្រប់គ្រងដោយយោធា ​រាយការណ៍ថាលំនៅឋានប្រជាពលរដ្ឋជាង ៨៥០ខ្នង ​សាលារៀន ៦៤ខ្នង មណ្ឌលសុខភាព ១៤កន្លែង ​និងប៉មអគារសហគមន៍៧ខ្នង នៅ​មីយ៉ាន់ម៉ា ត្រូវបានបំផ្លិចបំផ្លាញ ឬរងការខូចខាតដោយសារព្យុះ Mocha ដែលស្ថិតក្នុង​ចំណោម​ព្យុះដ៏ខ្លាំងក្លាបំផុតបោកបក់មកលើប្រទេសមួយនេះ ក្នុងរយៈពេលជាច្រើនឆ្នាំកន្លងមកនេះ ។

ដោយឡែក អ្នកនាំពាក្យកងកម្លាំងជីវពលកងទ័ពអារ៉ាកាន់ ​នៅរដ្ឋ Rakhineនិយាយថា ពួកគេ​ប្រើប្រាស់សម្ភារៈទំនាក់ទំនងរបស់ខ្លួន ​ដើម្បីប្រមូលព័ត៌មានពីផលប៉ះពាល់ដោយសារព្យុះ ពីព្រោះថា​បណ្តាញទំនាក់ទំនងស៊ីវិល​ ត្រូវបានបង្អាក់យ៉ាងធ្ងន់ធ្ងរ ។

ការិយាល័យមនុស្សធម៌អង្គការសហប្រជាជាតិ(OCHA)និយាយថា ​មនុស្សប្រហែល ៦លាននាក់ នៅ​ក្នុងតំបន់ ត្រូវការជំនួយមនុស្សធម៌រួចទៅហើយ ​មុនពេលព្យុះបោកបក់មកដល់ ពោល​គឺនៅក្នុងចំណោមពលរដ្ឋ ១,២លាននាក់​ ដែលបាន​ជម្លៀស​ខ្លួនក្នុងប្រទេស ដើម្បីរត់គេច​ចេញពីជម្លោះជនជាតិភាគតិច ៕