ដីព្រៃឈើដ៏ធំ Chaco ស្ថិតនៅតំបន់ភាគខាងជើងប្រទេសអាហ្សង់ទីន កំពុងរងសម្ពាធនៃការ​កាប់បំផ្លិចបំផ្លាញ ។ ដើមឈើត្រូវបានគេកាប់ឈូសឆាយ ដើម្បីចាប់យកដីដាំសណ្តែងសៀង និងធ្វើជាកសិដ្ឋានចិញ្ចឹមសត្វគោ-ក្របី​ ក្នុងបំណងឈានដល់តម្រូវការសកល ។

ប្រជាពលរដ្ឋក្នុងស្រុកមួយចំនួន និយាយថា ការកាប់ឆ្ការព្រៃឈើបែបនេះ អាចបង្កើតការងារថ្មីដល់​តំបន់ដាច់ស្រយាលនៅអាមេរិកខាងត្បូង ​ប៉ុន្តែប្រជាពលរដ្ឋជនជាតិដើមភាគតិចក្នុងស្រុក ធ្វើការព្រមានថា វានឹងបង្កផលរំខាងយ៉ាងធ្ងន់ធ្ងរដល់ជីវិតរស់នៅប្រចាំថ្ងៃរបស់ពួកគេ ។ អ្នកស្រី Noole រស់នៅក្នុងតំបន់ដីព្រៃឈើ Gran Chaco ស្ថិតនៅជិតទីក្រុងស្ងប់ស្ងាត់ Las Lomitas ។ គ្រួសាររបស់អ្នកស្រីគឺជាជនជាតិដើមភាគតិច Pilaga ។

មេដឹកនាំកុលសម្ព័ន្ធក្នុងស្រុកម្នាក់នេះ និយាយថា ដើមឈើបង្កើតជីវិតធម្មជាតិនៅទីនេះ វាផ្តល់​ជាចំណី​អាហារ ទឹក ម្លប់ ក៏ដូចជាគាំទ្រដល់ប្រព័ន្ធអេកូឡូស៊ី ។ ការទន្ទ្រានដី នឹងធ្វើឲ្យអាក់ខាន​ដល់ជីវិត​រស់នៅបែបនេះ ។

អ្នកស្រីបន្តថា ពួកយើងជាជនជាតិដើមភាគតិច Pilagaរងផលប៉ះពាល់ខ្លាំងណាស់ដោយសារតែការ​ឈូសឆាយដីព្រៃ ​ដោយសារតែការកាប់ឆ្ការបែបនេះ ​នឹងនាំឲ្យកើតមានគ្រោះរាំងស្ងួត ព្យុះកួច ។ ដើមឈើខ្លួនវាផ្ទាល់ដើរតួរយ៉ាងសំខាន់នៅក្នុងបរិស្ថាន ។

សូមបញ្ជាក់ថា ដីព្រៃ Gran Chaco ដែលជាដីព្រៃស្រូបយកឧស្ម័នកាបូនគ្របដណ្តប់លើព្រៃជប់ភ្លៀង​អាម៉ាហ្សូនរហូតដល់តំបន់ភាគខាងជើង ​គឺជាដីព្រៃធំបំផុតទី២នៅអាមេរិកឡាទីន ៕