ភ្នំពេញ៖ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) ព្រមានចាត់វិធានការផ្លូវច្បាប់ ចំពោះអ្នកក្លែងឯកសារ ឬបំពុលសង្គម ពាក់ព័ន្ធពិធីបិទផ្លូវការ នៃព្រឹត្តិការណ៍ស៊ីហ្គេម លើកទី៣២ នាថ្ងៃទី១៧ ខែឧសភា ឆ្នាំ២០២៣។

នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ក្រោយមានព័ត៌មានក្លែងក្លាយមួយចំនួន ត្រូវបានផ្សព្វផ្សាយលើបណ្ដាញសង្គម ក៏ដូចជាជន​ឆ្លៀតឱកាស​ ដែលធ្វើការក្លែងបន្លំឯកសារ ខុសពីគោលការណ៍ណែនាំរបស់គណៈកម្មាធិការជាតិ CAMSOC ។

ឯកឧត្តម បានបញ្ជាក់ថា សម្រាប់អ្នកក្លែងបន្លំឯកសារ ឬមានការផ្សព្វផ្សាយខុសពីគោលការណ៍​របស់គណៈកម្មាធិការជាតិ CAMSOC ​នឹងត្រូវទទួលទោសយ៉ាង​តឹងរឹង ​ចំពោះច្បាប់ជាធរមាន ។ ជាមួយគ្នា CAMSOC ក៏បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នចំពោះ​ប្រភពព័ត៌មាន​មិនផ្លូវការ ដែលនាំឲ្យខូចដល់បរិយាកាសភាពជោគជ័យ និងអស្ចារ្យរបស់ព្រឹត្តិការណ៍​ស៊ីហ្គេមជាប្រវត្តិសាស្ដ្រនេះផងដែរ ។

សូមបញ្ជាក់ថា ព្រឹត្តិការណ៍ស៊ីហ្គេម លើកទី៣២ នឹងត្រូវបិទជាផ្លូវការ នាល្ងាចថ្ងៃទី១៧ ខែឧសភា ឆ្នាំ២០២៣នេះ នៅពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ​និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បន្ទាប់ពីពិធីបើកដ៏​អស្ចារ្យ​ កាលពីថ្ងៃទី០៥ ខែឧសភាកន្លងទៅ ៕អត្ថបទ៖ លី ឈុនឡា