​អតីត​សហការី​របស់លោក Rudy Giuliani កំពុង​ប្តឹង​លោក​ពីបទ​រំលោភ​ផ្លូវភេទ និង​អំពើ​ខុសឆ្គង​ផ្សេងទៀត ដោយ​ចោទប្រកាន់​អតីត​អភិបាលក្រុង​ញូវយ៉ក​រូបនេះ​ថា​ជួល​នាង​ឱ្យបំពេញ​ចំណង់​ផ្លូវភេទ​របស់ខ្លួន​។​

​នៅក្នុង​ពាក្យបណ្ដឹង​រដ្ឋប្បវេណី​ដែល​បានដាក់​កាលពី​ថ្ងៃ​ចន្ទ​នៅ​ទីក្រុង​ញូវយ៉ក អ្នកនាង Noelle Dunphy បាន​និយាយថា​លោក Giuliani បានចាប់ផ្តើម​បំពាន​ខ្លួន​នាង​ស្ទើរតែ​ភ្លាមៗ​បន្ទាប់ពី​ការជួល​នាង​ក្នុង​ខែមករា ឆ្នាំ ២០១៩ ឲ្យ​ធ្វើជា​នាយក​ផ្នែក​អភិវឌ្ឍន៍​អាជីវកម្ម​។ អ្នកនាង​បាន​អះអាងថា លោក Giuliani បានបញ្ជាក់​យ៉ាងច្បាស់​ថា​ការបំពេញ​តម្រូវការ​ផ្លូវភេទ​របស់លោក​គឺជា "​តម្រូវការ​ដាច់ខាត​" នៃ​ការងារ​របស់​នាង​។​

​យោងតាម​ពាក្យបណ្តឹង លោក​Giuliani បាន​សន្យាថា​នឹង​បង់ប្រាក់​ឱ្យ​អ្នក​កនាង Dunphy ចំនួន ១ លាន​ដុល្លារ​ក្នុង​មួយឆ្នាំ និង​ធ្វើជា​តំណាងឱ្យ​នាង​ដោយ​ឥតគិតថ្លៃ​ក្នុង​បញ្ហា​ផ្លូវច្បាប់​ដាច់ដោយឡែក​ផ្សេងទៀត​ទាក់ទង​នឹង​ការរំលោភបំពាន​ក្នុង​គ្រួសារ ប៉ុន្តែ​លោក​បាន​និយាយថា ប្រាក់​ឈ្នួល​របស់​នាង​ត្រូវតែ​ពន្យារពេល ហើយ​ការងារ​របស់​នាង​ត្រូវបាន​រក្សាទុក​ជាសម្ងាត់ ព្រោះ​រឿងរ៉ាវ​ទាំងនោះ​អាច​នឹង​បង្កបញ្ហា​ដល់​ដំណើរការ​លែងលះ​របស់​លោក​នៅពេល​ក្រោយ​។

​ពាក្យបណ្តឹង​នោះបាន​និយាយថា អ្នកនាង​Dunphy ទទួលរង "​សម្ពាធ​យ៉ាងខ្លាំង​" ក្នុងការ​ធ្វើតាម​ការទា​ម​ទារ​របស់លោក Giuliani និង​បាន​ពិពណ៌នា​អំពី​ករណី​មួយ​ដែល​លោក​បាន​បង្ខំ​នាង​ឱ្យ​ធ្វើការ​រួមភេទ​តាម​មាត់​លើ​រូបលោក ដែល​ប្រឆាំងនឹង​ឆន្ទៈ​របស់​នាង​៕​