​នាយក​ប្រតិបត្តិ​ក្រុមហ៊ុន​តេ​ស្លា លោក Elon Musk ត្រូវបាន​កោះហៅ​ដោយ​សាលាក្ដី​នៃ​ប្រជុំ​កោះ​សហរដ្ឋអាមេរិក Virgin Islands ។ ដែនដី​អាមេរិក​មួយ​នេះ ចង់ឱ្យ​លោក Musk ប្រគល់​ឯកសារ​ទាក់ទង​នឹង​ជនល្មើស​ផ្លូវភេទ​គឺ​លោក Jeffrey Epstein ។​

​វា​ជា​ផ្នែក​ទាំងអស់​នៃ​បណ្តឹង​ដែល​សាលាក្ដី​ដែនដី​កោះ Virgin Islands បាន​ប្តឹង​ធនាគារ JP Morgan ដោយ​ចោទប្រកាន់ថា​ក្រុមហ៊ុន​នេះ ជួយ​ឲ្យ​មានការ​បំពាន​ផ្លូវភេទ​ដោយ​លោក Epstein នៅលើ​កោះ Little St. James ជា​កោះ​ឯកជន​ដែល​លោក​កាន់កាប់​នៅ​ទីនោះ​។​

​ក្រុម​មេធាវី​បាន​ចោទប្រកាន់ថា​ធនាគារ​ដ៏​ធំ​បំផុត​របស់​អាមេរិក​មួ​យ​នេះ មិន​អើពើ​នឹង​ការព្រមាន​ផ្ទៃក្នុង​អំពី​លោក Epstein អស់​រយៈពេល​ជាច្រើន​ឆ្នាំ មុនពេល​ទម្លាក់​លោក​ចេញ​ជា​អតិថិជន​នៅ​ឆ្នាំ ២០១៣​។ ធនាគារ​បាន​បដិសេធ​ថា​ពុំបាន​ដឹងលឺ​អំពី​ឧក្រិដ្ឋកម្ម​របស់លោក Epstein នោះទេ។​

​យោងតាម​ឯកសារ​របស់​តុលាការ​កាលពី​ថ្ងៃ​ច័ន្ទ លោក​Musk អាច​ជាប់​ព័ន្ធ​ទៅដល់​ធនាគារ JP Morgan តាមរយៈ​លោក Epstein​។ ឯកសារ​នោះ ​មិនបាន​ស្វែងរក​ការចោទប្រកាន់​លោក Musk ក្រោម​ពាក្យសម្បថ​ឬ​ការពាក់ព័ន្ធ​នឹង​លោក​ក្នុងការ​ប្រព្រឹត្ត​ខុស​ណាមួយ​ឡើយ​។ ទោះជា​យ៉ាងណាក៏ដោយ ដីកា​របស់​ប្រជុំ​កោះ​នោះ ទាមទារ​ឯកសារ​ណាមួយ​ដែល​លោក Musk មាន​អំពី​ការជាប់​ពាក់ព័ន្ធ​របស់លោក Epstein ក្នុងការ​ជួញដូរ​មនុ​ស្ស​។​

​វា​ក៏​ស្វែងរក​ទំនាក់ទំនង​រវាង​សហគ្រិន និង​ធនាគារ JP Morgan អំពី​លោក Epstein ក៏ដូចជា​រវាង Musk និង​លោក Epstein ផងដែរ​៕​