​មនុស្ស​ជាង ១០០​នាក់ ត្រូវបាន​ចាប់ខ្លួន​នៅ​រដ្ឋ​ភាគ​ខាងលិច Maharashtra ក្រោយ​មនុស្ស​ម្នាក់​ស្លាប់ និង​មនុស្ស ៨​នាក់​ផ្សេងទៀត រងរបួស អំឡុង​ការប៉ះទង្គិច​គ្នា​ក្នុង​សហគមន៍​ពាក់ព័ន្ធ​នឹង​ជម្លោះ​ខ្សែភាពយន្ត​ទាក់ទិន​នឹង​ក្រុម​រដ្ឋ​អ៊ីស្លាម ។

​សេចក្តីរាយការណ៍ បាន​ឲ្យ​ដឹងថា អំពើហិង្សា​ដែល​បាន​ផ្ទុះឡើង​នៅក្នុង​ទីក្រុង Akola បង្កឡើង​ដោយសារតែ​ការ​បង្ហោះ​ខ្សែភាពយន្ត​ជម្លោះ The Kerala Story នៅលើ​បណ្តាញ​ព័ត៌មាន​សង្គម ។

ក្រុម​អាជ្ញាធរ បាន​កាត់ផ្តាច់​សេវាកម្ម​អ៊ីនធឺណិត និង​ដាក់​បំរាម​គោចរ ដើម្បី​គ្រប់គ្រង​ស្ថានការណ៍ ។ ភ្នាក់ងារ​តម្រួត​ស្រី​ម្នាក់ ស្ថិតនៅ​ក្នុងចំណោម​អ្នករងរបួស​នៅក្នុង​ការប៉ះទង្គិច​គ្នា​នេះ ។

​ក្រុមនគរបាល​និយាយថា អំពើហិង្សា​បានចាប់ផ្តើម​ផ្ទុះ​ដំបូង​កាលពី​ថ្ងៃ​សៅរ៍ ពេលដែល​សមាជិក​ក្នុង​សហគមន៍ ជួបជុំគ្នា​នៅ​ខាងក្រៅ​ស្ថានីយ៍​នគរបាល​ក្រុង Akola​ដើម្បី​ប្រឆាំងនឹង​ការ​បង្ហោះ​ខ្សែភាពយន្ត​នៅលើ​បណ្តាញ​ព័ត៌មាន​សង្គម ។

​សេចក្តីរាយការណ៍​បាន​ឲ្យ​ដឹងថា វា​គឺជា​រូបថត​អេក្រង់​នៃ​ការសន្ទនា​គ្នា​រវាង​អ្នកស្រុក ២​នាក់ ដែល​ត្រូវបាន​ចែករំលែក​តាម​បណ្តាញ​ព័ត៌មាន​សង្គម Instagram ដោយ​ម្នាក់​ក្នុងចំណោម​ពួកគេ ។

​មន្ត្រីនគរបាល​ម្នាក់ និយាយប្រាប់​កាសែត Indian Express ថា សារ​មួយចំនួន​នៅក្នុង​ការជជែក​គ្នា​រវាង​អ្នកស្រុក​ទាំង ២​នាក់ បានធ្វើ​ឲ្យ​ប៉ះពាល់​ដល់​អារម្មណ៍​ផ្នែក​សាសនា​របស់​មនុស្ស​ផ្សេងទៀត ប៉ុន្តែ​ពួកគេ​ពុំបាន​ផ្តល់​សេចក្តីលម្អិត​ណាមួយ​នោះឡើយ ។

​ការិយាល័យ​អភិបាលរដ្ឋ Maharashtra លោក Eknath Shinde បាន​អំពាវនាវ​ឲ្យ​មាន​ភាពស្ងប់ស្ងាត់ និង​បាន​ណែនាំ​ង​ឲ្យ​នគរបាល​រដ្ឋ ចាត់វិធានការ​ដ៏​តឹងរឹង​បំផុត​លើ​អ្នក​ដែល​បាន​ចូលរួម​អំពើហិង្សា​នេះ ។

សូមបញ្ជាក់ថា ខ្សែភាពយន្ត The Kerala Story ដែល​បាន​ចាក់​បញ្ចាំង​នៅតាម​រោង​មហា​ស្រព​ភាពយន្ត​កាលពី​សប្តាហ៍​មុន បាន​បង្ក​ឲ្យ​មាន​ជម្លោះ​អស់​រយៈពេល​ជាច្រើន​ខែ​មកហើយ មុនពេល​ការចេញ​បញ្ចាំង​នៃ​ខ្សែភាពយន្ត​នេះ ។ ខ្សែភាពយន្ត​នេះ និយាយ​រៀបរាប់​ពី​រឿងប្រឌិត​របស់​ស្ត្រី​ឥណ្ឌា ៣​នាក់ មកពី​រដ្ឋ​ភាគខាងត្បូង ដែល​បាន​ចូលរួម​ជាមួយ​ក្រុម​រដ្ឋ​អ៊ីស្លាម៕

​