ប្រជាពលរដ្ឋនៅទូទាំងប្រទេសស៊ីរី បានបង្ហាញទស្សនៈខុសប្លែកគ្នាលើការបោះឆ្នោតនៅប្រទេសទួរគី ក្រោយលទ្ធផលបង្ហាញថា ការនាំមុខរបស់លោកប្រធានាធិបតី Tayyip Erdogan និងបេក្ខជនផ្សេងទៀត នឹងបន្តដល់ការបោះឆ្នោតជុំទី២ ។  

តាមរយៈការលាយដោយភាពមន្ទិលសង្ស័យ និងសុទិដ្ឋិនិយមប្រកបដោយក្តីសង្ឃឹម ប្រជាពលរដ្ឋស៊ីរី មាននូវទស្សនៈផ្សេងៗគ្នា មានចាប់ពីក្រុមប្រឆាំងរហូតដល់ក្រុមអ្នកគាំទ្រ ដោយសង្ឃឹមថាវានឹងធ្វើឲ្យស្ថានភាពនៅក្នុងប្រទេសរបស់ពួកគេកាន់តែល្អប្រសើរឡើង ។  

លោក Ahmet Yener គឺជាប្រធានគណៈកម្មាធិការបោះឆ្នោតជាន់ខ្ពស់ទួរគី(YSK) បានបញ្ជាក់កាលពីថ្ងៃចន្ទថា ការបោះឆ្នោតប្រធានាធិបតី នឹងបន្តដល់ការបោះឆ្នោតជុំទី២ រវាងលោកប្រធានាធិបតី Tayyip Erdogan និងគូប្រជែងសំខាន់របស់លោកនៅថ្ងៃទី ២៨ ខែឧសភាខាងមុខនេះ ស្របពេលដែលគ្មានភាគីណាមួយអាចរកបានសំឡេងឆ្នោតឈ្នះដាច់ ៥០ភាគរយ ។  

លោក Ahmet និយាយប្រាប់ក្រុមអ្នកសារព័ត៌មានថា ពេលដែលសន្លឹកឆ្នោត ៣៥.០០០សន្លឹកនៅពុំទាន់បានរាប់ លោក Erdogan ទទួលបានសំឡេងគាំទ្រ ៤៩,៥១ភាគរយ និងគូប្រជែងរបស់គាត់ គឺលោក Kemal Kilicdaroglu ទទួលបានសំឡេងគាំទ្រ ៤៤,៨៨ភាគរយ ។  

ទោះបីជាយ៉ាងណាក៏ដោយ គណបក្សសម្ព័ន្ធប្រជាជនរបស់លោក Erdogan រួមបញ្ចូលគណបក្សអ៊ីស្លាម AK និងគណបក្សដៃគូជាតិនិយមជាច្រើនទៀត ទំនងជាឈ្នះសំឡេងភាគច្រើននៅសភាថ្មី ចំនួន ៣២១អាសនៈក្នុងចំណោម ៦០០អាសនៈ ធ្វើឲ្យឱកាសរបស់លោកកាន់តែមានច្រើននៅការបោះឆ្នោតប្រធានាធិបតីជុំទី២នាពេលខាងមុខនេះ ៕