ភ្នំពេញ៖ គណៈប្រតិភូ ក៏ដូចកីឡាករបរទេស មុននឹងត្រឡប់ទៅប្រទេសកំណើតវិញ ក្រោយ​ព្រឹត្តិការណ៍កីឡាស៊ីហ្គេមបានបញ្ចប់ បានកោតសសើរដល់កម្ពុជា​ថា​ការរៀបចំធ្វើជាម្ចាស់​ផ្ទះលើកដំបូងនេះ ​គឺប្រព្រឹត្តិទៅបានយ៉ាងល្អប្រសើរ។

គណៈប្រតិភូក៏ដូចជាកីឡាករ ដែលបានស្នាក់នៅកម្ពុជាជាច្រើនថ្ងៃ រហូតដល់ថ្ងៃចុងក្រោយ​នៃការប្រកួត ​បានសម្ដែងការពេញចិត្តចំពោះការរៀបចំធ្វើជាម្ចាស់ផ្ទះស៊ីហ្គេមរបស់កម្ពុជា ជាលើកដំបូង។

ពួកគេមើលឃើញពីការរៀបចំបានល្អ ដោយរាប់បញ្ចូលទាំង ការទទួលស្វាគមយ៉ាងកក់ក្ដៅ ការ​ផ្ដល់ជូនកន្លែងស្នាក់នៅ ការគិតគូទៅលើម្ហូបអាហារ ​ការធ្វើដំណើរទៅមកពីកន្លែងស្នាក់នៅ និងកន្លែងប្រកួត ​ក៏ដូចជាភាពរួសរាយ​ ភាពសកម្មភាពការងារ និងទំនាក់ទំនងល្អរបស់​ក្រុម​អ្នមស័្មគ្រចិត្ត។

ពួកគេលើកឡើងដែរថា ការទទួលស្វាគមរបស់កម្ពុជា គឺផ្ដល់ភាពកក់ក្ដៅ ​និងធ្វើឪ្យពួកគេមាន​អារម្មណ៍ថា ​ដូចជារស់នៅក្នុងប្រទេសកំណើតរបស់ខ្លួន។

ទន្ទឹមនឹងភាពពេញចិត្តនេះ ពួកគេក៏សូមអរគុណដល់រាជរដ្ឋាភិបាលកម្ពុជា ក្នុងការផ្ដល់​ជូនគ្រប់​យ៉ាងដល់គណៈប្រតិភូ ​ក៏ដូចជាកីឡាករទាំង ១១ប្រទេស ដោយមិនតម្រូវឱ្យ​មានការចំណាយ​ណាមួយនោះទេ។

ភាពកក់ក្ដៅក៏ដូចជាការចងចាំល្អៗទាំងនេះ ​ធ្វើអោយពួកគេមានគោលដៅ មកទស្សនាកម្ពុជា​ជាថ្​មីនាពេលអនាគត។ ពួកគេមើលឃើញថា ​កម្ពុជា ​ជាប្រទេសស្អាតមានភាពទាក់ទាញជាខ្លាំង។

ការប្រកួតគ្រប់កីឡាក្នុងព្រឹត្តិការណ៍ស៊ីហ្គេម បានបិទបញ្ចប់ត្រឹមថ្ងៃទី១៦ ខែឧសភា ឆ្នាំ ២០២៣។ សម្រាប់កីឡាករ គណៈប្រតិភូ ​តាមប្រភេទកីឡាមួយចំនួនក៏ចាកចេញ​ទៅប្រទេស​កំណើត​ក្រោយការ​ប្រកួតប្រភេទកីឡារបស់ខ្លួនបានបិទបញ្ចប់។​ កីឡាករ និងគណៈប្រតិភូមួយចំនួន ក៏នឹងចាកចេញនៅថ្ងៃនេះ ​ហើយក៏មានក្រុមមួយចំនួន ​នឹងបន្តចាកចេញនៅថ្ងៃបន្តបន្ទាប់ផងដែរ៕ អត្ថបទ៖ គឹមហុក