ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានមានប្រសាសន៍ថា ទោះបីស៊ីហ្គេមបានបញ្ចប់ដោយជោគជ័យ តែយើងមិនចប់នៅត្រឹមនេះទេ ត្រូវខិតខំតទៅទៀត​សម្រាប់ចូលរួមនៅប្រទេសដទៃ ម៉្យាងទៀតកីឡាក៏នាំមកនូវសុខភាព និងជាស្ពានផ្សារភ្ជាប់ទំនាក់ទំនងរវាងប្រជាជន និងប្រជាជន ។

សម្តេចតេជោ នាយករដ្ឋមន្រ្តីកម្ពុជា មានប្រសាសន៍បែបនេះ ក្នុងពេលអនុញ្ញាតឱ្យឯកឧត្តម GOTORO OGAWA ប្រធានក្រុមគាំទ្រយូដូកម្ពុជា និងជាអតីតឯកអគ្គរាជទូតជប៉ុនប្រចាំនៅកម្ពុជា ចូលជួបសម្ដែងការគួរសម និងពិភាក្សាការងារ ។

ក្នុងជំនួបនៅវិមានសន្តិភាពទីស្ដីការនាយករដ្ឋមន្ត្រី នាព្រឹកថ្ងៃទី១៧ ខែឧសភានេះបើតាមឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ដល់ក្រុមអ្នកសារព័ត៌មានថា ឯកឧត្តម GOTORO បានសំដែងនូវការគោរព និងអបអរសាទរជូនដល់សម្ដេចតេជោ ដែលបានរៀបចំ ស៊ីហ្គេម​ទទួលបានជោគជ័យយ៉ាងត្រចះត្រចង់។

ឯកឧត្តមGOTORO បានគោរពជម្រាបជូនសម្ដេចតេជោថា កីឡាករ កីឡាការិនីកម្ពុជា គឺ​មានការតស៊ូ និងព្យាយាមខ្លាំងនៅពេល ​ដែលពួកគាត់ទៅ​ហ្វឹកហាត់​នៅ​ប្រទេសជប៉ុន​ គ្រូបង្វឹក កីឡាករ ​កីឡាការិនីកម្ពុជា​មានការគោរព ​និង​ភ្ញាក់ផ្អើល​យ៉ាងខ្លាំង។

ឯកឧត្តម បានមានប្រសាសន៍បន្ថែមថា កីឡាករ កីឡាការិនីកម្ពុជា គឺមានសក្កានុពល​និងទេពកោសល្យ​លើវិស័យយូដូណាស់។​ ក្នុងន័យនេះ​ ឯកឧត្តម GOTORO បានគោរព​ស្នើសុំការគាំទ្រពីសម្ដេចតេជោ ក្នុងការបន្តជួយ បង្វឹក កីឡាករ កីឡាការិនីកម្ពុជាតទៅទៀត។

ជាការឆ្លើយតបសម្ដេចតេជោ បានថ្លែងអំណរគុណជូនចំពោះឯកឧត្តម GOTORO OGAWA អ្នកគ្រូ លោកគ្រូ និង ប្រជាជនជប៉ុន​ ដែលបានជួយគាំទ្រ និងហ្វឹកហាត់ កីឡាករ កីឡាការិនីកម្ពុជា​រហូត​ទទួលបានមេដាយ ​ដែលពីមុនមកមិនដែលទទួល ​បានមេដាយច្រើនបែបនេះទេ។

សម្ដេចតេជោ បានស្នើសុំឲ្យឯកឧត្តម GOTORO OGAWA ​និងលោកគ្រូ អ្នកគ្រូយូដូ បន្តជួយ​ហ្វឹកហាត់​ដល់កីឡាករ ​កីឡាការិនីកម្ពុជា​តទៅទៀត ​ព្រោះថា បេសកកម្មរបស់កម្ពុជា មិនចប់​ត្រឹមស៊ីហ្គេមនោះទេគឺ ​នឹងត្រូវទៅចូលរួមការប្រកួតដទៃទៀត។

ម្យ៉ាងទៀតកីឡាគឺនាំមកនូវសុខភាពល្អ និងជាស្ពានផ្សារភ្ជាប់នូវទំនងរវាង ​ប្រជាជន និងប្រជាជន ជាពិសេសរវាង ​យុវជននិងយុវជន៕