ឯកសារដែលត្រូវបានពិនិត្យឡើងវិញដោយបណ្ដាញសារព័ត៌មាន Reuters បានបង្ហាញថា អតីតប្រធានាធិបតីប្រេស៊ីលលោក Jair Bolsonaro បានច្រានចោលការចោទប្រកាន់ កាលពីថ្ងៃអង្គារ ពីបទកែប្រែឯកសារចាក់វ៉ាក់សាំង COVID-19 របស់លោក ខណៈដែលអាជ្ញាធរក្នុងតំបន់ស៊ើបអង្កេតអតីតមេដឹកនាំស្តាំនិយមរូបនេះ និងសម្ព័ន្ធមិត្តមួយចំនួនរបស់លោក។

នៅក្នុងការផ្តល់សក្ខីកម្មរយៈពេលបីម៉ោងទៅកាន់នគរបាលសហព័ន្ធរបស់ប្រទេសប្រេស៊ីល លោក Bolsonaro បាននិយាយថា រូបលោក មិនបានដឹងអំពីព័ត៌មានក្លែងក្លាយ ដែលត្រូវបានបញ្ចូលនៅលើកាតចាក់វ៉ាក់សាំងរបស់លោកនោះទេ។

ឯកសាររបស់តុលាការកំពូល បានបង្ហាញថា នគរបាលសហព័ន្ធ បានរកឃើញ​ភស្តុតាង​នៃការ​លួចកែ​ប្រែបណ្ណ​ចាក់វ៉ាក់សាំងរបស់លោក ​Bolsonaro ក្នុងសប្តាហ៍ចុងក្រោយរបស់លោក ក្នុងនាមជាប្រធានាធិបតី កាលពីចុងខែធ្នូ មុនពេលដែលរូបលោកបានហោះហើរទៅកាន់​សហរដ្ឋអាមេរិក ដែលនៅទីនោះ ភ្ញៀវបរទេសភាគច្រើនត្រូវតែចាក់វ៉ាក់សាំង។

យោងតាមសម្រង់អត្ថបទពីការផ្ដល់សក្ខីកម្មរបស់អតីតប្រធានាធិបតីលោក​ Bolsonaro បាន​បដិសេធថា ពុំបានដឹងឮ ឬបញ្ជាឲ្យដាក់ព័ត៌មានក្លែងក្លាយ ដើម្បីបញ្ចូលទៅក្នុងឯកសារការ​ចាក់វ៉ាក់សាំង​នេះនោះឡើយ។

កាលពីដើមខែនេះ នគរបាលប្រេស៊ីល ​បានឆ្មក់ចូលគេហដ្ឋានអតីតមេដឹកនាំរូបនេះ បានចាប់​ខ្លួនជំនួយការដែលគួរឲ្យទុកចិត្ត ​និងរឹបអូសយកទូរស័ព្ទដៃរបស់លោក ដែលជាផ្នែកមួយ​នៃការ​ស៊ើបអង្កេតស្វែងរកចម្លើយពីរបៀបដែលលោក Bolsonaro ជាអ្នកត្រូវបានគេសង្ស័យពាក់ព័ន្ធ​នឹងវីរុស​កូរ៉ូណា ដែលបានប្ដេជ្ញាថា មិនធ្លាប់បានចាក់វ៉ាក់សាំងប្រឆាំង COVID-19 ទេ ត្រូវបានចុះឈ្មោះថា បានចាក់វ៉ាក់សាំង ​ក្នុងឯកសារបញ្ជាក់សុខភាព ដែលត្រូវបានផ្សព្វផ្សាយ​ជាសាធារណៈ ក្នុងខែកុម្ភៈ៕